डिचोली: देश विकसित करण्याची पंतप्रधान नरेंद्र मोदी यांची संकल्पपूर्ती होतानाच, देशावर सध्या जे संकट आले आहे. त्याचे श्री लईराई देवी निश्चितच निवारण करेल, असा विश्वास मुख्यमंत्री डॉ. प्रमोद सावंत यांनी श्री लईराई देवीचे दर्शन घेतल्यानंतर व्यक्त केला.

गोव्याची समृद्धीकडे वाटचाल व्हावी, अशी प्रार्थनाही करून, जत्रेची परंपरा जपणाऱ्या देवीच्या लाखो व्रतस्थ भक्तगणांना शुभेच्छा दिल्या. लईराई देवीच्या जत्रोत्सवानिमित्त मुख्यमंत्री डॉ. सावंत यांनी पत्नी सुलक्षणा सावंत यांच्यासह आज (शुक्रवारी) सकाळी शिरगाव येथे जाऊन देवीचे दर्शन घेऊन देवीच्या चरणी सेवा अर्पण केली.

गोमंतकीय जनतेची सेवा करण्यासाठी लईराई देवी मुख्यमंत्र्यांना बळ देवो, असे गाऱ्हाणे देवस्थान समितीतर्फे घालण्यात आले. मुख्यमंत्री डॉ. सावंत यांचे मंदिरात आगमन होताच देवीच्या दर्शनासाठी भक्तांची गर्दी उसळली होती. त्यामुळे काही क्षणांपुरते मंदिराच्या गर्भगृहाचे गेट बंद ठेवण्यात आले होते.