Pramod Sawant Kerala Visit

मुख्यमंत्री डॉ. प्रमोद सावंत यांनी चार दिवसांच्या दिल्ली दौऱ्यानंतर दक्षिण भारताचा राजकीय दौरा सुरु केला आहे. दिल्ली दौऱ्यावरून परतलेले मुख्यमंत्री दीड दिवसच गोव्यात होते, ते आता तेलंगणमार्गे केरळमध्ये पोचले आहेत.

मुख्यमंत्र्यांकडे भाजपने दक्षिण भारतातील लोकसभा निवडणुकीची जबाबदारी दिली आहे. त्यामुळे ते काल सोमवारी तेलंगणमधील भाजपच्या दोन विजय संकल्प यात्रेत सहभागी झाले. त्यानंतर ते आज केरळमध्ये पोचले आहेत.

सावंत यांनी इडुकी मतदारसंघातील भाजपच्या गाभा समितीची बैठक घेत लोकसभा तयारीचा आढावा घेतला. तेथे कोणते मुद्दे प्रचारात असतील हेही त्यांनी जाणून घेतले.

प्रतिस्पर्धी राजकीय पक्षांच्या तयारीचा अंदाजही त्यांनी घेतला आहे. मुख्यमंत्री कोट्टायम येथेही जाणार असून तेथे ते प्रमुख कार्यकर्त्यांची बैठक घेणार आहेत.

केरळमधील लोकसभा मतदारसंघात भाजपला विजर्या करण्यासाठी कोणते मुद्दे प्रभावी ठरू शकतील याचा अंदाज घेणे आणि संघटनात्मक पातळीवर तयारीचा आढावा घेणे, असा या बैठकीचा उद्देश असेल.

भाजपचा मी एक कार्यकर्ता आहे. त्या नात्याने पक्षाने दिलेली जबाबदारी पार पाडणे माझे कर्तव्य: आहे. राज्याबाहेरही मी पक्ष संघटनेचे काम करू शकतो, हा विश्वास पक्षाच्या ज्येष्ठ नेत्यांना वाटल्याने मला ही जबाबदारी दिली आहे, असे मुख्यमंत्री डॉ. प्रमोद सावंत म्हणाले.