CM Pramod Sawant: म्हादईच्या पाणी वळविण्याचा मुद्दा आत्ताचा नाही. काँग्रेसच्या सत्ताकाळात काँग्रेसने म्हादईचा गळा घोटण्याचे काम केले, खऱ्या अर्थाने म्हाईदचे डायव्हर्शन काँग्रेसच्या केंद्रातील तत्कालीन नेतृत्वाने केले आहे, असा आरोप मुख्यमंत्री डॉ. प्रमोद सावंत यांनी केला. तेव्हा कुणी काही बोलले नाही, आता मात्र भाजप सरकारवर आरोप केले जात आहेत. म्हादई हा मुद्दा काही जणांसाठी राजकारणाचा आहे, असेही ते म्हणाले. 'गोमंतक'चे संपादक-संचालक राजू नायक यांच्या सडेतोड नायक या ‘गोमन्तक टीव्ही’च्या कार्यक्रमात ते बोलत होते. (Mahadayi Water Dispute)

मुख्यमंत्री सावंत म्हणाले की, 2002 मध्ये तत्कालीन वाजपेयी सरकारने या कर्नाटकमध्ये या प्रकल्पाला परवानगी दिली नाही, असे काँग्रेसमधील काही नेते आज सांगत आहेत, ते खरेच आहे. 2008 ते 2012 या काँग्रेसच्या सत्ताकाळात कर्नाटकने म्हादईचे पाणी वळवले आहे. तेव्हा केंद्रासह कर्नाटक आणि गोव्यातही काँग्रेसची सत्ता होती. त्यावेळी कळसा प्रकल्पात कालवे बांधले आणि ते नंतर झाकले. तेव्हा काँग्रेसवाले गप्प राहिले. पण आता मात्र या मुद्यावरून राजकारण केले जात आहे. दरम्यान, यावेळी कळसा नदीतून कर्नाटकने पाणी वळविले असल्याचे मुख्यमंत्र्यांनी मान्य केले.

मुख्यमंत्री सावंत म्हणाले की, म्हादई प्रश्न हा गोवा कर्नाटक आणि महाराष्ट्र या तीन राज्यांचा आहे. या प्रकल्पातील 87 टक्के पाणी आणि भूभाग गोव्यात येतो. हा आंतरराज्य प्रश्‍न असल्याने तो सोडविण्यासाठी जल व्यवस्थापन प्राधिकरणाची गरज आहे. ही मागणी आम्ही जलशक्ती मंत्रालयाकडे लावून धरली आहे. येत्या आठ-दहा दिवसांत हे प्राधिकरण स्थापन व्हावे, यासाठी प्रयत्न केले जातील. सध्या पाणी वळवण्याच्या सुधारित प्रकल्प आराखड्याला जल आयोगाने मंजुरी दिली असली, तरी हा प्रश्‍न न्यायालयात नेणार आहे. तरी त्याला आणखीही मंजुऱ्या लागणार आहेत. पीआर मान्यता म्हणजे म्हादईच्या संपुर्ण प्रकल्पाला मान्यता नव्हे, असेही ते म्हणाले.