Goa CM Dr. Pramod Sawant Meet PM Narendra Modi

पणजी: गोव्याचे मुख्यमंत्री डॉ. प्रमोद सावंत यांनी देशाचे पंतप्रधान नरेंद्र मोदी यांची आज (२३ जानेवारी) नवी दिल्लीत भेट घेतली. मुख्यमंत्री सावंत कालपासून (२२ जानेवारी) दिल्लीत आहेत. बुधवारी त्यांनी अमित शहा, जे. पी. नड्डा यांची भेट घेतल्यानंतर आज त्यांनी मोदींची भेट घेतली.

सावंत मोदींची दिल्लीत भेट

मुख्यमंत्री सावंत यांनी दिल्लीत मोदींची भेट घेतली. "गोव्यात सुरु असलेल्या विविध विकासकामांची माहिती मोदींना दिली तसेच, त्यांच्या सहकार्याबाबत त्यांचे आभार मानले. राज्याच्या प्रगती आणि विकासासाठी त्यांचे बहुमोल मार्गदर्शन घेतले", अशी माहिती मुख्यमंत्री सावंत यांनी एक्सवरुन दिली आहे.

जे. पी. नड्डांची भेट

यापूर्वी सावंत यांनी राज्याचे नवे प्रदेशाध्यक्ष दामोदर नाईक यांच्यासह भाजपचे राष्ट्रीय अध्यक्ष तथा केंद्रीय मंत्री जे. पी. नड्डा यांची भेट घेतली. काही दिवसांपूर्वी नाईक प्रदेशाध्यक्षपदी विराजमान झाल्यानंतर नड्डांसोबत ही पहिलीच भेट होती.

गृहमंत्री अमित शहांची भेट

मुख्यमंत्री सावंत यांनी गृहमंत्री अमित शहा यांची देखील भेट घेऊन त्यांच्याकडून विविध मुद्यांवर मार्गदर्शन घेतले. दिल्लीतील मुख्यमंत्र्यांच्या भेटीगाठी राजकीय नसल्याचे स्पष्ट झाले असले तरी दोन दिवसांतील या घडामोडींमुळे मंत्रिमंडळ फेरबदलाच्या चर्चांना पुन्हा उधाण आले आहे.

अर्थमंत्री निर्मला सितारामण यांची भेट

दिल्लीत सावंत यांनी केंद्रीय अर्थमंत्री निर्मला सितारामण यांचीही भेट घेऊन, सावंत यांनी गोव्यासाठी सोळाव्या वित्त आयोगानुसार कराचा वाटा, यासह राज्याच्या प्रगतीसाठी महत्वाचे प्रस्ताव त्यांच्यासमोर मांडल्याचे सावंत यांनी म्हटले आहे.

पर्यावरण मंत्री भुपेंद्र् यादव यांची भेट

सावंत यांनी पर्यावरण मंत्री भुपेंद्र यादव यांची भेट घेऊन पश्चिम घाटातील जैव संवेदनशील क्षेत्रातील १०८ गावांमधील २१ गावे वगळण्याची मागणी त्यांच्याकडे केली. मंत्री यादव याबाबत सकारात्मक असल्याची माहिती सावंत यांनी दिली आहे.