Goa Temperature Forecast : गोवा राज्यात गेल्या दोन दिवसांपासून ढगाळ वातावरण कायम असून पुढील दोन दिवसही अशीच स्थिती राहण्याचा अंदाज गोवा वेधशाळेने वर्तविला आहे. बदलत्या हवामानामुळे वातावरणात गारवा आणि उष्णतेचे मिश्र स्वरूप जाणवत आहे.

राज्यात कमाल तापमान ३४.४ अंश सेल्सिअस, तर किमान तापमान २२.८ अंश सेल्सिअस नोंदविण्यात आले. कमाल तापमान सरासरीपेक्षा १.७ अंशांनी अधिक असून किमान तापमान १.८ अंशांनी कमी असल्याचे वेधशाळेने स्पष्ट केले आहे.

याशिवाय आर्द्रतेचे प्रमाण ७४ टक्के नोंदवले गेले असून ते काही प्रमाणात घटल्याचे दिसून आले. दरम्यान, पुढील चार दिवसांत कमाल तापमान ३३ ते ३४ अंश सेल्सिअस दरम्यान राहण्याची शक्यता व्यक्त करण्यात आली आहे.

ढगाळ वातावरणामुळे उकाडा कमी जाणवत असला तरी हवामानातील सततच्या बदलांमुळे नागरिकांनी आरोग्याची विशेष काळजी घेण्याची गरज आहे. विशेषतः संसर्गजन्य आजार टाळण्यासाठी स्वच्छता पाळणे, पुरेसे पाणी पिणे आणि आवश्यक ती खबरदारी घेण्याचे आवाहन आरोग्य विभागाकडून करण्यात आले आहे.