पणजी: गोवा चेंबर ऑफ कॉमर्स अँड इंडस्ट्रीने केंद्रीय वित्त मंत्री, बंगळुरचे प्रमुख प्राप्तीकर आयुक्त आणि गोवा प्राप्तीकर आयुक्तांना पत्र लिहून गोव्यातील करदात्यांना होत असलेल्या सतावणुकीचा विषय उपस्थित केला आहे. चेंबरचे अध्यक्ष उद्योगपती श्रीनिवास धेंपे आणि कर समितीचे अध्यक्ष सनदी लेखापाल रोहन भंडारे यांनी हे पत्र लिहिले आहे.
गोव्यातील अनेक करदात्यांना वित्तीय वर्ष 2023-24 साठी प्राप्तीकर परतावा सादर केल्यानंतर प्राप्तीकर विभागाकडून ‘डिफेक्टिव्ह रिटर्न’ संबंधित नोटीस मिळाली आहे. यामध्ये करदात्यांचे किंवा त्यांच्या जोडीदारांचे लेखापरीक्षण आवश्यक असल्याचे कारण देण्यात आले आहे. मात्र, हे वास्तव नसताना चुकीची नोटीस पाठवली गेली आहे. ही समस्या ‘पोर्तुगीज सिव्हिल कोड’अंतर्गत येणाऱ्या करदात्यांच्या रिटर्न्सची तांत्रिक चूक म्हणून ओळखली गेली आहे.
कारण आयकर परताव्यातील परिशिष्ट 5 अ या विभागात दोन प्रश्न विचारले जातात; परंतु या प्रश्नांना एकत्रित उत्तर देण्यासाठी एकच पर्याय दिल्याने हा तांत्रिक गोंधळ निर्माण होत आहे. त्यामुळे अनेक करदात्यांना अनावश्यकपणे उत्तर द्यावे लागत आहे आणि त्यांची ऊर्जा व वेळ वाया जात आहे, याकडे पत्रातून लक्ष वेधण्यात आले आहे.
अशा चुका न होण्यासाठी चेंबरने प्राप्तीकर विभागाला तांत्रिक अडचणी दूर करुन त्वरित योग्य निर्णय घेण्याची विनंती केली आहे. त्याचप्रमाणे, सणासुदीच्या काळात अशा सूचना न पाठवण्याचे आवाहनही केले आहे. या समस्येबद्दल तातडीने तोडगा काढावा, अशी मागणी केली आहे.
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.