पणजी: राज्यात गेल्या पाच वर्षात काजू लागवड क्षेत्रफळात मोठ्या प्रमाणात वाढ झाली आहे परंतु, उत्पादनात सातत्‍त्याने घट होत आहे. सतत होणाऱ्या हवामान बदलांचा परिणाम काजू, आंबा व इतर पीकांवर होत आहे.

परंतु, यंदा मागील दोन महिन्यांपासून कमी अधिक प्रमाणात थंडी कायम असल्याने आंबा काजूला चांगला मोहोर आला आहे. काही भागात आता काजू पीक घ्यायला सुरूवात झाली आहे.

त्यामुळे यंदा राज्यात काजू आणि आंब्याची पीक समाधानकारक मिळण्याची शक्यता अधिक असल्याचे कृषी संचालनालयाचे उपसंचालक दत्तप्रसाद देसाई यांनी सांगितले. देसाई म्हणाले, राज्यात सध्या काजूची जूनी झाडे आहेत आता नव्याने लागवड मोठ्या प्रमाणात झाली आहे. लागवड ही प्रामुख्याने कलमी काजूची केली असल्याने येत्या काही वर्षात काजूचे उत्पादनात पुन्हा वाढ होईल.

पंधरा दिवसांत काजू मिळतील

सत्तरी तालुक्यातील काही भागात आता कमी प्रमाणात काजू बोंडू देखील आले असून नव्या काजू पिकाला सुरूवात झाली आहे. येत्या पंधरा दिवसात काजू हंगामाला सुरूवात होईल. राज्यातील फेणी उत्पादक देखील हंगामाच्या अनुषंगाने तयारीला लागले आहेत.