Canacona News: गुळे येथे विहिरीतील मृत कासव काढण्यासाठी गेलेल्या दोघांचा बुडून मृत्यू झाल्याची दुर्दैवी घटना आज (शुक्रवारी) सायंकाळी ७ वाजण्याच्या सुमारास घडली. नमी गावकर (रा. गुळे) आणि बारकेलो गावकर (गोकुल्डे-बार्शे) अशी या दोघांची नावे आहेत.

अग्निशामक दलाच्या अधिकाऱ्यांनी दिलेल्या माहितीनुसार, नमी आणि बारकेलो हे दोघे आज सायंकाळी ७ वाजण्याच्या सुमारास गुळे येथे विहिरीतील मृत कासव काढण्यासाठी पाण्यात उतरले होते.

ते दोघेही विहिरीत बुडाल्याची माहिती मिळताच अग्निशामक दलाचे जवान आणि काणकोण पोलिसांनी तत्काळ घटनास्थळी धाव घेतली आणि बुडालेल्यांना वर काढले. विशेष म्हणजे, नमी आणि बारकेलो हे दोघेही पोहण्यात तरबेज होते.

तरीही त्यांचा पाण्यात बुडून मृत्यू झाल्याने आश्चर्य व्यक्त करण्यात येत आहे. ते दोघेही पेट्रोल पंपवर काम करत होते. ही घटना घडल्यानंतर पेट्रोल पंपवर जमाव जमला. लोकांना आवरताना पोलिसांच्या नाकीनऊ आले. मृतदेह विहिरीतून बाहेर काढल्यानंतर पोलिसांनी पंंचनामा केला.