सासष्टी: गोमंतकीयांना पिस्तुल दाखविण्यासाठी भूमिपुत्र गोव्यात पोहचलेले असून यासंबंधी मुख्यमंत्र्यांना विचारल्यास रात्री फिरल्यास पिस्तुल दाखविणारचं असे स्पष्टीकरण मुख्यमंत्र्यांकडून मिळण्याची अपेक्षा आहे. जेव्हा गोव्याचा प्रमुखच खनिज वाहतुकीच्या ट्रिप्स मोजू लागतो, तेव्हा गोवा गॅग ऑफ वासेपुर बनू शकतो, अशी टीका गोवा फॉरवर्ड पक्षाचे (Goa Forward Party) अध्यक्ष तथा फातोर्डाचे आमदार विजय सरदेसाई (Vijai Sardesai) यांनी केली.

मुरीडा फातोर्डा येथील नाल्याची पाहणी केल्यावर पत्रकारांशी बोलताना त्यांनी वरील टीका केली. सरदेसाई पुढे म्हणाले, कंलगुटमध्ये देशी कट्टा सापडल्याने गोमंतकीयांना पिस्तुल दाखविण्यासाठी भूमिपुत्र गोव्यात पोहचल्याचे स्पष्ट झाले आहे. गोव्यात खाण व जलद पैसे स्त्रोत वाढतात तेव्हा पिस्तुल संस्कृती गोव्यात येऊ शकते. यावर पोलिसांनी योग्यरित्या स्पष्टीकरण देणे आवश्यक आहे. गोवा पोलिस सत्ताधारी पक्षाच्या प्रवक्त्या सारखे वक्तव्य करु लागलेले असून पोलिसांनी पोलिसांसारखे वागणे आवश्यक आहे.

गोव्यात खून, बलात्कार व अन्य गुन्ह्यांमध्ये वाढ होत चाललेली असून पोलिसांनी कुठल्याही प्रकरणाचा छडा लावण्यापूर्वी गुन्हे रोखण्यासाठी प्रयत्न केला पाहिजे. राज्यात विरोधी पक्ष एकत्र नसल्यामुळे सत्ताधारी पक्षाने गोवा विकायला काढलेला आहे, असा आरोप विजय सरेदसाई यांनी केला. तर, सत्ताधारी पक्षाचा गोवा व गोमंतकीय विरोधी कृत्यांचा गोवा फॉरवर्ड पक्ष सतत पर्दाफास करीत राहणार, असेही त्यांनी स्पष्ट केले.