Goa C-20 Conference : आंतरराष्ट्रीय ‘जी-20’अंतर्गत येत्या शनिवार दि. 27 मे रोजी दाबोळी-वास्को येथे गोवा सरकार, महर्षी अध्यात्म विश्‍‍वविद्यालय, ‘इंटरनॅशनल सेंटर फॉर कल्चरल स्टडीज आणि भारतीय विद्या भवन नवी दिल्ली या संस्थांच्या संयुक्त विद्यमाने ‘सी-20’ परिषदेचे आयोजन करण्यात आले आहे.

गोव्यात प्रथमच आयोजित ‘सी-२०’ परिषद ही ‘विविधता, सर्वसमावेशकता आणि परस्पर आदर’ या विषयावर होणार आहे. आध्यात्मिक मार्गाने विश्‍वातील समस्यांचे निराकारण शक्य असल्याचे मत नवी दिल्ली येथील इंटरनॅशनल सेंटर फॉर कल्चरल स्टडीजच्या अध्यक्ष प्रा. डॉ. शशी बाला यांनी व्यक्त केले.

या परिषदेनिमित्त पणजीत घेण्यात आलेल्या पत्रकार परिषदेला महर्षी अध्यात्म विश्वविद्यालयाच्या संशोधन समन्वयक श्‍‍वेता क्लार्क आणि डॉ. अमृता देशमाने या उपस्थित होत्या. दाबोळी येथील राजहंस नौदल सभागृहात सकाळी १० ते संध्याकाळी ५ या वेळेत परिषद होणार आहे. तिचे उद्‍घाटन मुख्यमंत्री डॉ. प्रमोद सावंत हे करतील. यावेळी पर्यटनमंत्री रोहन खंवटे, कला व संस्कृतीमंत्री गोविंद गावडे उपस्थित राहणार आहेत.

परिषदेत आरोग्य, पर्यावरण, शिक्षण, उद्योग, पारंपरिक कला, पर्यटन अशा विविध क्षेत्रांतील देश-विदेशातील नामांकित वक्ते मार्गदर्शन करणार असल्याची माहिती क्लार्क यांनी दिली.

अध्यात्म ही भारताची मोठी शक्ती

जगातील अनेक देश भारतापेक्षा अधिक संपन्न, तसेच संपत्ती, शस्त्रास्त्रे आणि विकास यात खूप पुढे आहेत. पण भारत हा अध्यात्म क्षेत्रातील गुरु आहे. अध्यात्म ही भारताची मोठी शक्ती आहे. जगभरात ज्या काही समस्या आहेत, त्याचे उत्तर अध्यात्मातून मिळू शकते, या दृष्टीनेच आंतरराष्ट्रीय ‘जी-20’अंतर्गत असलेली ‘सी-20’च्या विविध कार्यक्रमांचे आयोजन करण्यात आले आहे, अशी माहिती डॉ. बाला यांनी दिली.

आर्थिक संकट आणि हवामान बदल, दहशतवाद, महामारी यासारख्या जागतिक समस्यांविरोधात लढण्यासाठी तसेच युद्ध आणि दहशतवाद थांबवणे या उद्देशाने ‘जी-२०’ची निर्मिती झाली. ‘सी-20’ हा त्याचाच एक भाग आहे.