पणजी: मध्य प्रदेशातील इंदूरमध्ये यकृत प्रत्यारोपणाच्या माध्यमातून एका व्यक्तीला नवजीवन मिळाले आहे. गोव्याहून इंदूरला विमानाने आणलेले यकृत ६७ वर्षीय व्यक्तीच्या शरीरात यशस्वीपणे प्रत्यारोपित करण्यात आले. याशिवाय हेल्थवे रुग्णालयातील ३४ वर्षीय रुग्ण आणि गोमेकॉतील ४२ वर्षीय महिलेला प्रत्येकी एक मुत्रपिंड दान करण्यात आले.

मणिपाल रुग्णालयाच्या वैद्यकीय अधिकाऱ्यांनी दिलेल्या माहितीनुसार, ४५ वर्षीय अजय गिरी यांना २६ जानेवारी रोजी ब्रेन हॅमरेजमुळे गोव्यातील मणिपाल रुग्णालयात दाखल करण्यात आले होते. रुग्णाच्या प्रकृतीत सुधारणा होत नसल्याने डॉक्टरांनी त्यांना २९ जानेवारीला ब्रेन डेड घोषित केले.

गिरी यांच्या कुटुंबाने त्यांचे अवयव दान करण्यास सहमती दर्शवली, त्यानंतर शल्यचिकित्सकांनी त्यांच्या ब्रेन डेड बॉडीमधून यकृत काढले. अजयचे यकृत गोव्याहून मध्य प्रदेशातील इंदूरला गुरुवारी सायंकाळी खासगी विमान कंपनीच्या विमानाने पाठवण्यात आले.

यकृत रक्त फिल्टर करते, पोषक घटकांचे चयापचय करते आणि अन्न पचवण्यास मदत करते.

इंदूरमधील एका खासगी रुग्णालयात दाखल असलेल्या ६७ वर्षीय रुग्णाच्या शरीरात नंतर हे यकृत प्रत्यारोपित करण्यात आले. 'यकृत प्रत्यारोपणाच्या ऑपरेशननंतर रुग्णाची प्रकृती बरी आहे. गिरी यांच्या मरणोत्तर अवयवदानामुळे त्यांना नवजीवन मिळाले, अशी माहिती इंदूर सोसायटी फॉर ऑर्गन डोनेशनचे संस्थापक-सचिव डॉ संजय दीक्षित यांनी पीटीआयला दिली.

याशिवाय अजयाच्या अवयवांमुळे आणखी दोघांना जीवदान मिळाले आहे. हेल्थवे रुग्णालयातील ३४ वर्षीय रुग्ण आणि गोमेकॉतील ४२ वर्षीय महिलेला प्रत्येकी एक मुत्रपिंड दान करण्यात आल्याने त्यांना नवसंजीवनी मिळालीय.