Salcete: भारतीय जनता पक्ष केवळ विकासच करीत नाही, तर समाजातील प्रत्येक घटक सशक्त व सुरक्षित व्हावा यासाठी सशक्त समाज, सुरक्षित समाज हे ध्येय बाळगून कार्यरत असतो. भाजप आरोग्य, स्वच्छता यावर जास्त भर देत आहे, असे प्रतिपादन कॉंग्रेसमधून नुकतेच भाजपमध्ये प्रवेश केलेले मडगावचे आमदार दिगंबर कामत यांनी केले.

भाजप युवा मोर्चा व महिला मोर्चा यांच्या संयुक्त विद्यमाने कोंब - मडगाव येथील विमलाबाई कारे सभागृहात सेवा पंधरवडाअंतर्गत आयोजित आरोग्य चिकित्सा शिबिराचे समई प्रज्वलित करून उद्‍घाटन केल्यानंतर ते बोलत होते.

एक दिवसीय आरोग्य चिकित्सा शिबिराला उत्स्फूर्त प्रतिसाद लाभला. उद्‍घाटन सोहळ्यास मडगावच्या उपनगराध्यक्ष दीपाली सावळ, नगरसेवक सगुण नायक, दामोदर शिरोडकर, युवा मोर्चाचे मडगावचे अध्यक्ष अक्षय पारकर, महिला मोर्चाच्या अध्यक्ष तनुजा पैंगीणकर, सचिव सोनल म्हापसेकर, शर्मद रायतुरकर, योगिराज कामत उपस्थित होते.

राज्य महिला मोर्चाच्या सरचिटणीस रंजिता पै यांनी सर्वांचे स्वागत केले, तर अक्षय पारकर यांनी आभार मानले. या आरोग्य शिबिरात कान, डोळे, रक्त, मधुमेह व इतर आजारांची तपासणी करण्यात आली, रुग्णांना आरोग्य केंद्रामार्फत मोफत औषधे देण्यात आली.

तसेच, या आरोग्य चिकित्सा शिबिरात डॉ. प्रतिष्ठा कुंकळ्येकर, डॉ. पूर्वा वाघ पै काणे, डॉ. विजेता जांबावलीकर, डॉ. नीरज बोरकर, डॉ. शौरी केंकरे, डॉ. सायली कुडचडकर यांनी रुग्णांची तपासणी केली.