Goa Government: मुख्यमंत्री डॉ. प्रमोद सावंत यांच्या नेतृत्वाखाली सरकार स्थिर आहे. विकासाची गतीही ‘डबल इंजिन’द्वारे सुरू असताना मुख्यमंत्री बदलण्याची शक्यताच नाही. मुख्यमंत्री बदलला जाईल ही अफवा असून विरोधकांकडून ती पसरविली जात आहे, असा दावा भाजप प्रदेशाध्‍यक्ष सदानंद शेट तानावडे यांनी केला.

पेडणे येथील प्रसिद्ध पुनवेला आल्यानंतर देवदर्शन घेऊन स्थानिक पत्रकारांशी तानावडे बोलत होते. पत्रकारांनी राजकारणाबाबत प्रश्‍‍न विचारले असता ते म्‍हणाले की, मुख्यमंत्री बदलण्याचा प्रश्नच नाही.

काँग्रेसमधून भाजपमध्‍ये आलेल्‍या आमदारांना पक्षाने कोणतेच आश्वासन दिलेले नाही. किंवा एखाद्या मंत्र्याला वगळून त्याच्‍या जागी दुसरा मंत्री बसवला जाण्याची शक्यताही त्‍यांनी फेटाळून लावली. दरम्‍यान, मुख्यमंत्री डॉ. प्रमोद सावंत, पर्यटनमंत्री रोहन खंवटे, आमदार प्रवीण आर्लेकर यांनीही पुनव उत्‍सवाला उपस्‍थिती लावून श्रींचे दर्शन घेतले.

आर्लेकरांच्‍या मंत्रिमंडळ समावेशाबाबत नंतर बघू

पेडणे मतदारसंघाचे आमदार प्रवीण आर्लेकर यांना भविष्यात मंत्रिमंडळात घेणार का, असा प्रश्न केला असता तानवडे म्‍हणाले की, सध्या आर्लेकर यांच्याकडे हस्तकला महामंडळ आहे. या मंडळामार्फत ज्या योजना आहेत.

तसेच, त्या मतदारसंघाबरोबरच प्रत्येक राज्यात पोहोचविण्याचे ते काम करीत आहेत. सध्या मंत्रिमंडळाचा आकडा कमी प्रमाणात असल्याने तो वाढविता येत नाही. एखाद्या वेळी भविष्यात पुढच्या निवडणुकीत काहीही बदल घडू शकतो. ते काय ते नंतर बघू.

..तर 'त्‍यांना' आमदारकीचा राजीनामा द्यावा लागेल

• मांद्रेचे आमदार जीत आरोलकर यांना भाजपमध्‍ये प्रवेश देणार का, असा सवाल पत्रकारांनी उपस्थित केला असता सदानंद शेट तानावडे यांनी सांगितले की, मगोचे आमदार तथा ज्‍येष्‍ठ नेते सुदिन ढवळीकर आणि मांद्रेचे आमदार जीत आरोलकर यांनी भाजप सरकारला पाठिंबा दिलेला आहे.

• जीत आरोलकर यांना पक्षात यायचे असेल तर थेट त्‍यांना घेता येणार नाही. आमदारकीचा राजीनामा देऊन त्‍यांना यावे लागेल आणि सध्या तरी तसा प्रस्ताव आपल्यापर्यंत आलेला नाही. तसा प्रस्‍ताव आला नंतर त्‍यावर भाष्‍य करू. दरम्‍यान, पेडणे तालुक्यात तीन मतदारसंघ होणार का, असा प्रश विचारला असता या निवडणुकीत तरी शक्य नसल्याचे त्‍यांनी सांगितले.