Banastarim Bridge Accident: बाणस्तारी अपघातातील कारचालक संशयित श्रीपाद ऊर्फ परेश सावर्डेकर याने जामिनासाठी धडपड सुरूच ठेवली आहे. फोंडा अतिरिक्त सत्र न्यायालयाने बुधवारी जामीन फेटाळल्यानंतर मुंबई उच्च न्यायालयाच्या गोवा खंडपीठात त्याने जामिनासाठी अर्ज केला आहे.

ही सुनावणी ११ ऑगस्ट रोजी घ्यावी, अशी त्याच्या वकिलांनी केलेली विनंती गोवा खंडपीठाने फेटाळून त्यावरील सुनावणी १७ ऑगस्टला ठेवली आहे.

परेश सध्या म्हार्दोळ पोलिस ठाण्यात कोठडीत असून त्याची कोठडीची मुदत रविवारी संपणार आहे. त्यामुळे पोलिस त्याला सोमवारी पुन्हा न्यायालयात हजर करणार आहेत. त्यापूर्वीच त्याने उच्च न्यायालयात जामिनासाठी अर्ज करून त्यावरील सुनावणी प्राधान्यक्रमाने ११ रोजी घेण्याची विनंती वकिलांमार्फत केली.

कारण शनिवारपासून (12 ऑगस्ट) उच्च न्यायालयाला 16 ऑगस्टपर्यंत सुट्टी आहे. परेशला कोठडीची मुदत संपल्यानंतर पुन्हा पोलिस किंवा न्यायालयीन कोठडीत राहावे लागणार असल्याने त्याच्या वकिलांनी उच्च न्यायालयात उद्याच्या सुनावणीसाठी विनवणी केली. मात्र, या प्रकरणावर तातडीने सुनावणी घेण्याचे कारण नसल्याचे निरीक्षण न्यायालयाने तोंडी नोंदवले.

मेघनाच्या अर्जाचीही प्रतीक्षा

अपघातावेळी मर्सिडीज कार परेश नव्हे तर त्याची पत्नी मेघना सावर्डेकर ही चालवत होती अशी भूमिका दिवाडीवासीयांनी घेऊन तिला अटक करण्याची मागणी केली. तिने अटकपूर्व जामिनासाठी अर्ज केला. या अर्जावरील सुनावणीवेळी काल न्यायालयाने तिला अंतरिम जामीन मंजूर केला आहे.यावरील सुनावणीकडे सर्वांचे लक्ष लागले आहे.