Bhutani Infra Project Sancoale

पणजी: सांकवाळ येथील प्रकल्पाला पर्यावरण दाखला आवश्यक असताना तो घेतला गेला नसल्याचा आरोप गोवा बचाव अभियानने केला आहे.

नियमानुसार २० हजार चौरस मीटरपेक्षा जास्त आकाराच्या प्रकल्पांसाठी पर्यावरणीय मंजुरी आवश्यक असते. असे असताना ८५ हजार ८८६ चौरस मीटर क्षेत्रातील प्रकल्पासाठी आवश्यक असतानाही पर्यावरणीय मंजुरी घेण्यात आली नसल्याकडे गोवा बचाव अभियानच्या निमंत्रक सबिना मार्टिन्स व सचिव रेबोनी सहा यांनी लक्ष वेधले आहे.

त्यांनी म्हटले आहे की, शासकीय भूगोल नकाशे दर्शवितात की प्रकल्पाच्या जागेवरील उतार अनुमत मर्यादेपलीकडे आहेत. टॉपोग्राफिकल नकाशांचे उल्लंघन करून डोंगर कापणीसाठी आवश्यक १७ अ अंतर्गत परवानगी न घेता मंजुरी मिळाली आहे. प्रकल्पाला २०० चटई निर्देशांकासह वाणिज्य १ विभाग प्रमाणपत्र दिले गेले, ज्याची परवानगी फक्त ‘सेंट्रल बिझनेस डिस्ट्रिक्ट’मध्ये दिली जाते; परंतु या प्रकल्पाला ती मंजुरी कशी दिली गेली, हा मोठा प्रश्न आहे.

एवढ्या मोठ्या प्रकल्पासाठी योग्य रस्ता प्रवेश नसणे, हा एक महत्त्वाचा मुद्दा आहे. या खास सर्व्हे क्रमांक २५७/१ वरच खासगी जंगल चिन्हांकन रद्द करण्यात आले आहे.

सर्व परवाने रद्द करावेत

१. मार्टिन्स आणि सहा यांनी म्हटले की, सांकवाळमध्ये एक एकराहून अधिक क्षेत्र तलावांनी व्यापलेल्या जमिनीच्या भू-रूपांतरास परवानगी देणे हे पाण्याच्या ताण असलेल्या गावात जीवनाच्या रक्षक नौकेत छिद्र पाडण्यासारखे आहे. गैरसमजुतींवर आधारलेले सर्व परवाने रद्द करावेत.

२. मुरगाव नियोजन व विकास प्राधिकरणाच्या अध्यक्षांनी तांत्रिक परवानगी मागे घ्यावी आणि पंचायत संचालकांनी पंयायतीमार्फत मंजूर केलेल्या परवानग्या रद्द कराव्यात. मुख्यमंत्र्यांनी गप्प बसू नये, जनतेच्या आवाजाला प्रतिसाद देऊन गोव्यातील जनतेला न्यायाची बाजू दर्शवावी.