पेडणे: विधानसभा निवडणुकी (Goa Assembly Election) संदर्भात सर्वत्र चर्चा सुरू आहे. मात्र, त्‍या अफवा की काय ते मला माहीत नाही. पण, भाजप पक्षश्रेष्ठींचा माझ्यावर पूर्णपणे विश्वास आहे. मतदारसंघातील माझ्या कार्यामुळे आगामी विधानसभा निवडणुकीसाठी पेडणे मतदारसंघातून मलाच उमेदवारी मिळेल, याचा मला पूर्ण विश्वास आहे, असा दावा उपमुख्यमंत्री बाबू आजगावकर यांनी आज पत्रकारांशी बोलताना केला.

गेल्या विधानसभा निवडणुकीनंतर (Assembly Election) भाजपचे (BJP) सरकार घडविण्यासाठी मी सहकार्य केले. प्रमोद सावंत (Pramod Sawant) यांच्यासारख्या चांगल्या मुख्यमंत्र्याच्या हाताखाली काम केले. त्यानंतर पेडणे व राज्यात भाजप पक्ष वाढविण्यासाठी मी माझ्या कार्यकर्त्यांच्या सहकार्याने कार्य केले. पेडणे मतदारसंघ पूर्णपणे भाजपमय केला. मगोचे उमेदवार म्हणून इतके दिवस कार्य करणारे प्रवीण आर्लेकर यांना भाजपमध्ये घेऊन त्यांना पेडणेतून (Pernem) भाजपची उमेदवारी देण्याच्या दृष्टीने प्रयत्न सुरू आहेत. या प्रश्नावर बोलताना उपमुख्यमंत्री आजगावकर म्हणाले की, ते त्यावेळी पाहूया. भाजपने तुम्हाला उमेदवारी नाकारली, तर तुम्हाला कुठला राजकीय पक्ष जवळचा आहे? त्यावर ‘अशी वेळच येणार नाही’, असे उपमुख्यमंत्री आजगावकर (Babu Ajgaonkar) म्हणाले.