मडगाव: घोगळ येथील सुन्नी गुलिस्तान मशिदीचे उपाध्यक्ष अली कलंदर खानजादे यांच्या खून प्रकरणी बंगळुरू विमानतळावर जेरबंद केलेल्या अल्ताफ शाह सय्यद याला बुधवारी गोव्यात आणण्यात आले. वैद्यकीय तपासणीदरम्यान त्याने छातीत कळा येत असल्याची तक्रार केल्याने त्याला दक्षिण गोवा जिल्हा इस्पितळात दाखल करण्यात आले.

इस्पितळातून डिस्चार्ज मिळाल्यानंतर त्याला पुढील चौकशीसाठी कोठडी मागणीसह न्यायालयात हजर करण्यात येणार असल्याची माहिती फातोर्डा पोलिस ठाण्याचे निरीक्षक दितेंद्र नाईक यांनी दिली.

अल्ताफ हा खून घडण्याच्या दोन दिवसांपूर्वी दुबईला पळून गेला होता. तेथून परत आल्यानंतर त्याला बंगळुरू विमानतळावर ताब्यात घेण्यात आले. या प्रकरणातील तो नववा संशयित आहे. ३० जानेवारी रोजी शुक्रवारी नमाजानंतर अली कलंदर खानजादे यांचा पोटात चाकू खुपसून खून करण्यात आला होता. मशिदीच्या समितीवरील वर्चस्वाच्या वादातून हा खून झाल्याचे तपासात समोर आले आहे.

या प्रकरणी फातोर्डा पोलिसांनी अक्रम खानसह आलम सय्यद, लतीफ सय्यद, उबेद्दुला मकंदर, सक्रुद्दिन शेख, हुसेन खान, निजामुद्दीन सय्यद आणि साहिल कन्वी उर्फ स्पाकी या आठ जणांना अटक केली होती. त्यांच्यावर भारतीय न्याय संहितेच्या कलम १०३ (२), ६१, ३५१ व १९० अंतर्गत गुन्हा नोंद करण्यात आला आहे. याच प्रकरणात सर्फराज मकंदर व मेहबूब मकंदर या दोघांचा अटकपूर्व जामीन अर्ज न्यायालयाने फेटाळला होता.

दरम्यान, अक्रम खान हा या प्रकरणातील प्रमुख संशयित असून तो व साहिल कन्वी सध्या न्यायालयीन कोठडीत आहेत. इतर काही संशयितांना जामीन मंजूर झाला आहे.