Goa Agriculture News: स्वयंपूर्ण गोव्यासाठी कृषी उत्पादनात वाढ करणे गरजेचे आहे. यासाठी संशोधनाची गरज असून भारतीय कृषी संशोधन परिषदेच्या (आयसीएआर) समन्वयाने कृषी संशोधन सुरू केले जाईल, अशी माहिती मुख्यमंत्री डॉ. प्रमोद सावंत यांनी दिली. त्यांच्या हस्ते काल जुने गोवे येथे कृषी महाविद्यालयाचे उद्‍घाटन करण्यात आले. त्यावेळी ते बोलत होते.

राज्य सरकारच्या कृषी व्यवस्थापन आणि विस्तार प्रशिक्षण संस्थेच्या सहकार्याने जुने गोवे येथे गोवा कृषी महाविद्यालय सुरू करण्यात आले आहे. कृषिमंत्री रवी नाईक, कृषी संचालक नोयल अल्फान्सो, उच्च शिक्षण सचिव प्रसाद लोलयेकर, आमदार राजेश फळदेसाई, कृषी सचिव अरुणकुमार मिश्रा, गोवा विद्यापीठाचे कुलगुरू हरिलाल मेनन, उत्तर गोवा जिल्हा पंचायतीचे अध्यक्ष सिद्धेश नाईक, रितेश नाईक, महाविद्यालयाचे प्राचार्य डॉ. प्रवीण भेंडे उपस्थित होते.

मुख्यमंत्री म्हणाले, आत्मनिर्भर भारतासाठी स्वयंपूर्ण गोवाही महत्त्वाचा आहे. यासाठी राज्य सरकारकडून स्वयंपूर्ण मित्रांच्या साहाय्याने कृषी उत्पादन वाढीसाठी प्रयत्न केले जात आहेत. याला आता संशोधनाची जोड आवश्यक आहे. जर एकात्मिक कृषी कार्यक्रमांतर्गत नवे संशोधन शेतकऱ्यापर्यंत पोहोचले, तर त्याचा उपयोग उत्पादन वाढीसाठी नक्कीच होईल. कृषी संशोधन संस्थेसाठी लागणारे सर्व सहकार्य राज्य सरकारच्या वतीने देण्यात येईल.

पशुवैद्यकीय महाविद्यालय उभारणार

किसान क्रेडिट कार्ड सुविधा, कृषी संशोधन व प्रशिक्षण केंद्र उभारणे, याबरोबरच कृषी महाविद्यालयाबरोबर पशुवैद्यकीय महाविद्यालय आणि किनारपट्टी भागात मत्स्य उत्पादनावर संशोधन करणारी किनारी संस्था विकसित करण्याचा राज्य सरकारचा विचार असून याबाबत लवकरच निर्णय घेण्यात येईल, असे मुख्यमंत्री म्हणाले.