Swiggy Dilevery Boy collide with 10 year boy on bicycle at Siolim Church: स्विगी या फूड डिलिव्हरी कंपनीचा डिलिव्हरी बॉय म्हणून काम करत असलेल्या एकाने कामावर असताना दुचाकीवरून जाताना थेट एका दहा वर्षांच्या मुलाला उडविल्याची घटना घडली आहे. शिवोली चर्चजवळ हा अपघात झाला.

अरहाना मोतिवाला असे जखमी मुलाचे नाव आहे. त्याचे वय दहा वर्षे असून तो फर्नांडिस वाडा, शिवोली येथे राहतो. सध्या त्याच्यावर रुग्णालयात उपचार सुरू आहेत.

शिवोली चर्चजवळ सायंकाळी हा प्रकार घडला. अरहान हा सायकलपटू आहे. तो सायकलिंग करतो. सायकलवर अनेक चित्तथरारक प्रात्यक्षिकेही करतो. दरम्यान, आज रविवारी सायंकाळी अरहान सायकलवरून घरी जात असताना हा अपघात घडला.

प्रत्यक्षदर्शींकडून मिळालेल्या माहितीनुसार स्विगीचा डिलिव्हरी बॉय शिवोलीतील दांडो वाड्डो येथे जात होतो. तो अॅक्टिव्हा स्कूटर चालवत होता. त्याच्या दुचाकीची धडक अरहानच्या सायकलला बसली.

या धडकेत अरहान जखमी झाला. त्याला तत्काळ शिवोली प्राथमिक आरोग्य केंद्रात हलवण्यात आले. घटनास्थळी उपस्थित असलेल्या स्थानिकांनी आक्रमक होत संबंधित डिलिव्हरी बॉयला जाब विचारला. यावेळी स्थानिक लोक संतप्त झाले होते.

दरम्यान, हणजुणे पोलिसांनी घटनास्थळी धाव घेत माहिती घेतली. पोलिसांनी या अपघाता पंचनामा केला आहे. पोलिस या प्रकरणाचा अधिक तपास करत आहेत.