37th National Games: यजमान या नात्याने 37व्या राष्ट्रीय क्रीडा स्पर्धेत गोव्याचा सर्वाधिक खेळांत सहभाग होता, त्यामुळे त्यांच्या खेळाडूंचीही संख्या वाढली. राज्याचे 910 क्रीडापटूंनी प्रतिनिधित्व केले व एकूण 92 पदके जिंकण्यात यश मिळविले.

गोव्याने राष्ट्रीय क्रीडा स्पर्धेच्या इतिहासातील सर्वोत्तम कामगिरी नोंदविताना 27 सुवर्ण, 27 रौप्य व 38 ब्राँझपदकांची कमाई केली. इतर राज्यांतर्फे हरियानाच्या खेळाडूंचा सर्वाधिक सहभाग होता. या राज्याच्या एकूण 797 खेळाडूंची नोंदणी झाली.

तब्बल 29 वर्षांनंतर स्पर्धेत सर्वासाधारण विजेतेपद पटकावलेल्या महाराष्ट्राचे 761खेळाडू स्पर्धेत खेळले, तर दिल्लीचे पथक 568 खेळाडूंचे होते. तांत्रिक माहिती स्पर्धेच्या सोशल मीडिया अकाऊंटवर नोंदीत करण्यात आली आहे.

एकूण 1880 पदके

37 व्या राष्ट्रीय क्रीडा स्पर्धेत एकूण 1880 पदकांसाठी 42 खेळांत क्रीडापटू मैदानात उतरले. यामध्ये 555 सुवर्ण, 546 रौप्य, तर 779 ब्राँझपदके होती. महाराष्ट्राने 80 सुवर्ण, 69 रौप्य, ७९ ब्राँझ मिळून सर्वाधिक 228 पदके प्राप्त केली.

दुसरा क्रमांक सेनादलास मिळाला. त्यांनी ६६ सुवर्ण, २७ रौप्य व ३३ ब्राँझ मिळून एकूण १२६ पदकांची कमाई केली. हरियानाला पदकतक्त्यात तिसरा क्रमांक मिळाला. त्यांनी ६२ सुवर्ण, ५५ रौप्य व ७५ ब्राँझ मिळून एकूण १९२ पदके जिंकली.

पुरुष खेळाडू जास्त

गोव्यातील ३७व्या राष्ट्रीय क्रीडा स्पर्धेत एकूण सहभागी खेळाडूंत पुरुष क्रीडापटूंची संख्या जास्त ठरली. स्पर्धेत ५३८० पुरुष, तर ४७६४ महिला क्रीडापटू खेळले. स्पर्धेत २२५४ तांत्रिक अधिकारी, २४९६ सपोर्ट स्टाफ आणि ४३५६ स्वयंसेवकांची नोंदणी झाली.