फोंडा: आगामी गोवा विधानसभा निवडणुक लढवण्यासाठी विविध राजकीय पक्षातील अनेक नेते उत्सुक आहेत. यातच पक्षांतरामुळे प्रत्येक मतदारसंघात तिकिटाचे दावेदार वाढत आहेत. उमेदवारी नेमकी कुणाला जाहीर करायची? हा सर्व राजकीय पक्षांच्या पुढे मोठा प्रश्न आहे. उमेदवारी नाकारली की नेते लगेच बंड करण्यासाठी सरसावतात. भाजपला (BJP) देखील बंडखोरांमुळे मोठा फटका बसत आहे. (BJP Goa Assembly Election)

गोविंद गावडे यांनी भाजपमध्ये प्रवेश केल्यामुळे प्रियोळ मतदारसंघातील भाजपचे पदाधिकारी आणि मुख्य कार्यकर्त्यांनी सामूहीक राजीनामा दिला. गोविंद गावडेंच्या पक्ष प्रवेशामुळे हा गट नाराज असल्याचे बोलले जात आहे. भाजपच्या उमेदवारीसाठी इच्छुक संदीप निगळ्ये यांनी अपक्ष लढण्याचा निर्णय घेतला आहे. गोविंद गावडेंच्या पक्ष प्रवेश व उमेदवारीबाबत प्रियोळ भाजपकडून निषेध व्यक्त करत हा निर्णय घेण्यात आला आहे.

या बंडखोरीची पुनरावृत्ती आता फोंड्यात होताना दिसत आहे. रवी नाईक यांनी मागच्या वर्षी कॉंग्रेसला (Congress) सोडून भाजपचा हात धरला. फोंड्यातून (Phonda) त्यांना भाजपची उमेदवारी मिळण्याची जास्त शक्यता आहे. परिणामी भाजपचे संदीप खांडेपारकर यांनी बंड पुकारला आहे. भाजपकडून फोंड्याची उमेदवारी न मिळाल्यास अपक्ष म्हणून निवडणुकीत उतरणार असल्याचे त्यांनी जाहीर केले आहे. फोंडा मतदारसंघ आदर्श बनवण्याची त्यांनी ग्वाही दिली आहे. आयात नव्हे निष्ठावंताना तिकिट द्या, असा टोला देखील त्यांनी लगावला आहे.