मडगाव: घोगळ येथे एका घाऊक दारू दुकानाला रविवारी सकाळी भीषण आग लागून मोठे नुकसान झाले. या दुर्घटनेत अंदाजे पाच ते सहा लाख रुपयांचे नुकसान झाल्याचा प्राथमिक अंदाज मडगाव अग्निशामक दलाने व्यक्त केला आहे.

आगीची माहिती मिळताच अग्निशामक दलाचे अधिकारी गील सोझा यांच्या मार्गदर्शनाखाली जवानांनी तातडीने घटनास्थळी धाव घेत आग आटोक्यात आणली. रोडॉल्फो दोराय अपार्टमेंटच्या तळमजल्यावर असलेल्या ‘राइट लिकर’ या दुकानाला सकाळी सुमारे सव्वा दहाच्या सुमारास आग लागली.

हे दुकान केनेडी सोझा यांच्या मालकीचे असून आगीचे नेमके कारण अद्याप स्पष्ट झाले नाही. मात्र ‘शॉर्ट सर्किट’मुळे आग लागली असावी, असा प्राथमिक अंदाज व्यक्त करण्यात आला आहे.

या आगीत चार रेफ्रिजरेटर, दारूच्या बाटल्या तसेच इतर साहित्य जळून खाक झाले. आगीची झळ शेजारील सोन्याच्या दागिन्यांच्या दुकानालाही बसली असून त्या दुकानातील एसी जळाल्याची माहिती आहे. आग विझविण्यासाठी अग्निशामक दलाच्या दोन बंबांचा वापर करण्यात आला.