सासष्टी: काही दिवसांपूर्वी गोवा फुटबॉल असोसिएशनचे अध्यक्ष कायतान फर्नांडिस यांनी मडगावात दक्षिण गोव्यातील सर्व फुटबॉल क्लबची बैठक बोलावून त्यात हाऊजी बंदीवर चर्चा केली. त्यावेळी त्यांनी हाऊजीवरील बंदी उठवावी, अशी मागणी सरकारकडे केली होती. मात्र, मंगळवारी (ता.१५) पत्रकारांशी बोलताना त्यांनी सांगितले की, गोव्यात हाऊजी माफिया कार्यरत आहेत, हे खरे आहे. मुख्यमंत्री डॉ. प्रमोद सावंत यांनी याची सखोल चौकशी करून दंडात्मक कारवाई करावी.

हाऊजी गोव्यात (Goa) गत ७० वर्षांपासून सुरू आहे. गोव्यातील फुटबॉल क्लब जीएफए तसेच सोसायटी कायद्याखाली नोंद झालेले आहेत. त्यांचे हिशोब तपासले जातात. हे सर्व क्लब गरीब आहे. त्यासाठी एखादी स्पर्धा आयोजित करून व हाऊजीद्वारे खर्चापुरते पैसे गोळा करणे एवढ्यापुरतीच ती मर्यादित होती.

दररोजच्या सामन्यासाठी ५० ते १०० रुपये शुल्क व जास्तीत जास्त २ ते ५ हजार रुपये बक्षिसाची रक्कम, अंतिम सामन्यात जर त्या स्पर्धेच्या पुरस्कर्त्याने देणगी दिली तर रक्कम जास्तीत जास्त ५० हजार ते एक लाख रुपये असायची. यापेक्षा जास्त हाऊजीत बक्षिसाची रक्कम गेलेली नाही, असेही कायतान फर्नांडिस यांनी सांगितले.

नावेलीतून सुरुवात

या दिवसांत १०, २०, २५, ५० लाख रुपयांपर्यंत बक्षिसांची रक्कम देण्यात येते. हे प्रकरण नक्की काय हे आम्हालाही माहिती नाही. या चार-पाच हाऊजी माफियांमुळे फुटबॉल क्लबची बदनामी होत आहे. ही सुरुवात नावेलीतून झाल्याचे कायतान फर्नांडिस यांनी सांगितले.