पणजी: काहीच दिवसांपूर्वी सेंट फ्रान्सिस झेवियर य‍ांच्याबाबत वादग्रस्त वक्तव्ये करून तुरुंगात गेलेल्या आणि जामिनावर मुक्त झालेला हिंदुत्ववादी गौतम खट्टर शनिवारी स्थानिक पत्रकारांवरच घसरला. त्यामुळे पत्रकारितेसह राजकीय क्षेत्रातूनही त्याच्यावर टीकेची झोड सुरू झाली आहे. जामिनावर मुक्तता झाल्यानंतर पणजीतील पत्रकारांनी प्रश्न विचारण्यासाठी खट्टरभोवती गराडा घातला.

त्यावेळी ‘गोव्यातील पत्रकार पत्रकारितेची शिस्त पाळत नाहीत, त्यांनी पत्रकारितेची नैतिकता शिकावी. मीही पत्रकारितेचा विद्यार्थी असून त्यात पदवी संपादन केली आहे’, अशी मुक्ताफळे त्याने उधळली. दरम्यान, खट्टरच्या या वक्तव्यांनंतर गोवा श्रमिक पत्रकार संघटनेसह (गुज) ज्येष्ठ पत्रकारांनी त्याचा निषेध नोंदवला, तर ‘बाहेरून गोव्यात येऊन जे जातीय तेढ निर्माण करण्याचा प्रयत्न करीत आहेत, त्य‍ांना अवाजवी प्रसिद्धी दिल्यास त्यांच्यात पत्रकारांनाही नितीमत्ता शिकवण्याचे धाडस येते’ असे गोवा फॉरवर्डचे अध्यक्ष विजय सरदेसाई म्हणाले.

‘फूट न पाडता वार्तांकन करणे म्हणजे जबाबदार पत्रकारिता. गोमंतकीय जनतेने शांत रहावे. राज्यातील धार्मिकबल सलोखा अबाधित ठेवावा. तणावपूर्ण काळात चिथावणीच्या जाळ्यात अडकू नये’, असे आवाहनही त्यांनी केले.

गोव्यातील पत्रकारांची नैतिकता आणि शिष्टाचारावर प्रश्नचिन्ह उपस्थित करणारी अशी सरसकट विधाने केवळ निराधारच नाहीत, तर सत्य, उत्तरदायित्व आणि जनसेवेची मूल्ये सातत्याने जपणाऱ्या या समुदायाचा तो घोर अपमान आहे, असे काँग्रेस समितीच्या प्रसारमाध्यम विभागाचे अध्यक्ष अमरनाथ पणजीकर यांनी म्हटले आहे. गोव्यातील प्रसारमाध्यमांनी नेहमीच निर्भीडपणे वस्तुस्थितीचे वार्तांकन करून आणि जनतेशी संबंधित महत्त्वाचे प्रश्न उपस्थित करून लोकशाही बळकट करण्यात महत्त्वाची भूमिका बजावली आहे.

प्रसारमाध्यमांनी अधोरेखित केलेल्या समस्यांचे निराकरण करण्याऐवजी, त्यांना बदनाम करण्याचे आणि त्यांची विश्वासार्हता धुळीस मिळवण्याचे प्रयत्न केले जात आहेत, ही अत्यंत दुर्दैवी बाब आहे. खट्टर यांनी आपले विधान तात्काळ मागे घ्यावे आणि गोव्यातील प्रसारमाध्यम क्षेत्राची बिनशर्त माफी मागावी, अशी मागणी त्यांनी केली आहे.दरम्यान, ‘गोवा युनियन ऑफ जर्नालिस्ट्स’ने (गुज) गोव्यातील पत्रकारितेच्या नैतिकतेविषयी युट्यूबर गौतम खट्टर यांनी केलेल्या टिप्पणीचा तीव्र शब्दांत निषेध केला आहे.