पणजी: राज्याचे मुख्यमंत्री डॉ. प्रमोद सावंत यांच्याविरोधात बदनामीकारक व्हिडिओ बनविणाऱ्या अभिनेता गौरव बक्शीला उच्च न्यायालयाकडून मोठा दिलासा मिळाला आहे. बक्शीविरोधात दाखल करण्यात आलेला गुन्हा रद्द करण्यात आला आहे. केलेल्या व्हिडिओबाबत बक्शीने कोर्टासमोर माफी मागितल्यानंतर गुन्हा रद्द करण्यात आला. दरम्यान, त्याला ५० हजार रुपयांचा दंड ठोठावण्यात आला आहे.

गौरव बक्शीने गेल्या काही दिवसांपूर्वी मुख्यमंत्री डॉ. प्रमोद सावंत यांच्याविरोधात बदनामीकारक व्हिडिओ प्रसिद्ध केला होता. राज्यातील वनक्षेत्र कमी होण्यास मुख्यमंत्री व तत्कालिन वनमंत्री सावंत जबाबदार असल्याचा आरोप बक्शीने केला होता. राज्यातील मोठ्या प्रमाणावर वनक्षेत्र लँड माफियांना दिल्याचा आरोप बक्शीने केला होता. याप्रकरणी बक्शीविरोधात गुन्हा शाखेने गुन्हा नोंद केला होता.

जुलै महिन्यात याप्रकरणी गुन्हा शाखेने गुन्हा नोंद केला होत. याप्रकरणी मुंबई उच्च न्यायालयाच्या गोवा खंडपीठात याप्रकरणी सुनावणी झाली असता, गौरव बक्शीने केलेल्या व्हिडिओबाबत कोर्टासमोर माफी मागितली.

तसेच, व्हिडिओ तथ्यावर आधारीत नसल्याचे सांगितले. बक्शीची माफी विचारात घेऊन कोर्टाने गुन्हा रद्द केला पण, त्याला ५० हजार रुपयांचा दंड ठोठावला आहे. दंडाची ही रक्कम गोवा फाऊंडेशन या समाजसेवी संस्थेला देण्यात यावी असे आदेश कोर्टाने दिले आहेत.

गौरव बक्शीने वादग्रस्त व्हिडिओ सोशल मीडियावरुन हटवल्याचे देखील कोर्टासमोर सांगितले आहे. बक्शीने मुख्यमंत्री प्रमोद सावंतच नव्हे तर यापूर्वी मंत्री नीळकंठ हळर्णकर यांच्याशी देखील पंगा घेतला होता. गाडीवरुन मंत्री हळर्णकरांशी घातलेल्या हुज्जतीवरुन बक्शीला अटक करण्यात आली होती. त्यानंतर मुख्यमंत्र्यांविरोधात केलेल्या व्हिडिओवरुन बक्शी वादात सापडला होता.