Sports Authourity of Goa: वास्को बेलाबाय - चिरकूनऊडी येथील गोवा क्रीडा प्राधिकरणाच्या (साग) मालकीच्या जागेत कचरा टाकण्यात येत असल्यामुळे या परिसराला डंपिंग ग्राऊंडचे स्वरूप प्राप्त झाले आहे. सागने याबाबत त्वरीत कारवाई करावी, अशी मागणी होत आहे.

येथे कचरा टाकण्याने मुरगावातील दुसरा कचरा प्रकल्प येथे तयार होत आहे. ही जागा वास्को टिळक मैदानावर राज्य, राष्ट्रीय, आंतरराष्ट्रीय फुटबॉल सामने पाहण्यासाठी येणाऱ्यांच्या वाहनांना पार्किंग व्यवस्थेसाठी राखीव ठेवण्यात आली होती.

परंतु वास्को येथील गोवा शिपयार्ड कंपनीने सागच्या जागेत आपल्या आस्थापनात दोन मोठ्या इमारती व शिपयार्डचा विस्तार करण्यासाठी काढलेल्या फायलिंग मातीचा ढिगारा या जागेत टाकला आहे.

सध्या या जागेवर भंगार वाहनांसह खाजगी बसेस पार्क करून अतिक्रमण करण्यात आल्याचे दिसते. या संपूर्ण जागेत भंगार आणि कचरा टाकला गेला आहे.

येथे सध्या वास्कोसह दाबोळीतील कचरा टाकण्यात येत असल्याची माहिती आहे. येथील शेत जमीन बुजविण्यात आली आहे. यावर्षी गोव्यात राष्ट्रीय क्रीडा स्पर्धा होणार आहे. येथील मैदानावर सामने होतील तेव्हा पार्किंगसाठी या जागेचाच वापर केला जाईल.

त्यामुळे गोवा क्रीडा प्राधिकरणाने त्वरीत या जागेवर अतिक्रमण करणाऱ्यांवर कारवाई करावी. येथे दिवस रात्र सुरक्षा रक्षक नेमावा, अशी मागणी होत आहे.