मडगाव : मडगाव महानगरपालिकेच्या उद्यानासमोर असलेल्या जिल्हाधिकारी कार्यालयाचे स्थलांतरण फातोर्डा येथील नव्या संकुलात करण्यात आले आहे. मात्र काही सरकारी कार्यालये अजूनही या जुन्या जिल्हाधिकारी कार्यालय इमारतीत सुरु आहेत. त्यांची कागदपत्रे या ठिकाणी अस्ताव्यस्त पडली असून त्यामुळे परिसरात कचऱ्याचं साम्राज्य असल्याचं दिसत आहे.

जुन्या जिल्हाधिकारी (Collector) कार्यालय परिसरात ई कचऱ्याचे डोंगर साचले आहेत. अशा प्रकारे येथील सरकारी कार्यालयांची दैना झाली आहे. या इमारतीला चार मजले असून याठिकाणी एकंदरीत 6 सरकारी कार्यालये आहेत. यातील अनेक कार्यालयातील कचरा (Garbage) बाहेरच टाकण्यात येतो. त्यामुळेच परिसरात कचऱ्याचे ढीग जमा झाले आहेत.

यातील काही कागदपत्रे गहाळ झाल्यास आपली कामे घेऊन येत असलेल्यांना नाहक मनस्ताप सहन करावा लागणार आहे. अनेक कार्यालयातील कागदपत्रांचे डिजिटायझेशन अपूर्ण राहिलेले आहे. त्यामुळे एखादी फाईल गहाळ झाल्यास त्या व्यतीला ती प्रक्रियेसाठी पुन्हा सादर करावी लागणार आहे. यासोबतच नादुरुस्त असलेली विद्युत उपकरणे, जुने संगणक, त्यांचे सुटे भाग आणि इतर साहित्याचे ढीग परिसरात दिसत आहे. त्यामुळे मडगाव (Madgaon) येथील परिसराला बकाल स्वरुप प्राप्त झाले आहे.