कोलवा पोलीस स्थानकासाठी जागेचा शोध सुरु

सासष्टी: गेल्या दहा वर्षांपासून कोलवा पोलिस स्थानक कोलवा येथील एका जुन्या घरात कार्यरत आहे. हे घर पुष्कळ जुने आहे. त्याचे दरवाजे मोठे आहेत. खिडक्यांना, दरवाजांना लोखंडी ग्रील्सही नाही. तसेच या इमारतीला संरक्षक भिंत नाही. त्यामुळे या पोलिस स्थानकासाठी संबंधित खाते जागेच्या शोधात आहे.

कोलवा पोलिस स्थानकाचे कार्यक्षेत्र सासष्टीतील समुद्र किनारी भागात आहे. नऊ वर्षांपूर्वी याच पोलिस स्थानकात हाणामारीचा प्रकार घडला होता. तेव्हा जिल्हाधिकाऱ्यांमार्फत चौकशी करण्यात आली होती. तेव्हाच्या जिल्हाधिकारी संध्या कामत यांनी आपल्या अहवालात, ही जागा पोलिस स्थानकासाठी सुरक्षित नाही, असा शेरा मारला होता.(Colva Police News Updates)

पर्यटन खात्याच्या भूखंडाचे काय झाले?

मध्यंतरी कायतू सिल्वा आमदार होते, तेव्हा सरकारकडे पोलिस स्थानक इमारतीसाठी मागणी केली होती. तसेच पोलिस खात्याने सरकारला पर्यटन खात्याच्या अंदाजे 2500 चौरस मीटर भूखंडासाठी प्रस्ताव सादर केला होता. मात्र, नंतर काहीच निष्पन्न झाले नाही. यासंदर्भात पत्रकारांशी संवाद साधताना कोलवा पोलिस स्थानकाचे निरीक्षक मेल्सन कुलासो यांनी सांगितले, की पर्यटन खात्याच्या भूखंडासंदर्भात काहीच निर्णय झालेला नाही. पोलिस खाते कोलवाच्या आसपास पोलिस स्थानकासाठी जागेच्या शोधात आहे.