Gangwar in Colvale Jail : राज्यातील कोलवाळ कारागृह नेहमीच या-ना त्या कारणाने चर्चेत असते. नुकत्याच मिळालेल्या माहितीनुसार, जेलमधील दोन गटांमध्ये टोळीयुद्ध झाले असल्याची घटना घडली आहे. यामुळे पुन्हा एकदा तुरुंग प्रशासनाच्या कामावर प्रश्नचिन्ह उपस्थित करण्यात आले आहे.

जेलमध्ये गॅंगवॉर...

माहितीनुसार, कोलवाळ कारागृहात टारझन आणि कार्बोटकर अशा दोन टोळ्या सक्रिय आहेत. यांच्यामध्ये सुरुवातीपासूनच वैर असल्याचे सांगण्यात येत आहे. दरम्यान, टारझन या टोळीला न्यायालयात सादर व्हायचे होते.

न्यायालयातून कारागृहात परत आल्यानंतर ते वैद्यकीय चाचणी करण्यासाठी गेले असता कार्बोटकर टोळीतील कैद्यांनी टारझन टोळीवर हल्ला चढवला. यानंतर टारझन टोळीतील कैद्यांनी तिथून पळ काढला आणि डिस्पेंसरी गाठली. यावेळी तिथे असलेल्या डॉक्टरांनी या प्रकरणात हस्तक्षेप केला आणि तुरुंग अधिकाऱ्यांना याबाबत माहिती दिली.

यानंतर लगेचच तुरुंग अधिकारी तसेच कोलवाळ आणि म्हापसा पोलीस स्थानकातून अतिरिक्त अधिकारी कारागृहात दाखल झाले. पोलिसांनी संबंधित प्रकरणात धाव घेत विषय तिथेच मिटवला.

दरम्यान,  याबाबत वरिष्ठ पोलीस अधिकाऱ्याशी संपर्क साधला असता, त्यांनी स्पष्ट माहिती देण्यास नकार देत विषय तितका गंभीर नसल्याचे सांगितले. मात्र कारागृहात वारंवार घडणाऱ्या घटनांवरून कैदी प्रशासन आणि पोलिसांना जुमानत नसल्याचे म्हटले जात आहे.