Ganesh Chaturthi : गणेश चतुर्थीच्या निमित्ताने राज्यभरात स्वयंपूर्ण चतुर्थी बाजार भरविण्याचे सरकारने ठरवले असून त्याअंतर्गत काणकोणातही चावडी येथील कदंब बसस्थानकाच्या आवारात हा बाजार 20 ऑगस्टपासून भरविण्यात येणार आहे. या बाजारात एकूण 70 दालने असतील.

यासंदर्भात काणकोणच्या उपजिल्हाधिकारी कार्यालयात झालेल्या तालुका नोडल अधिकारी विनायक वळवईकर आणि स्वयंसाहाय्य गटांच्या बैठकीत बाजाराची रूपरेषा ठरविण्यात आली.

बाजारात सहभागी होण्यासाठी कोणतेही शुल्क आकारले जाणार नाही. ज्यांना या बाजारात सहभागी व्हायचे आहे, त्यांनी नोडल अधिकारी विनायक वळवईकर यांच्याशी वा संबंधित पंचायत क्षेत्राच्या स्वयंपूर्ण मित्राशी संपर्क साधावा, असे आवाहन करण्यात आले आहे.

या बाजारात प्रामुख्याने चतुर्थीनिमित्त लागणारे माटोळी आणि फराळाचे साहित्य मांडले जाणार असून पाच पाल्यांच्या भाजीचे वेगळे दालन, हे त्याचे खास वैशिष्ट्य राहणार आहे. माटोळी, केळी, पूजा साहित्य, भाजीपाला, मिठाई, मसाले, लोणची व पापड, नारळ, फुले, मखर, पत्रावळी आणि केळीची पाने, लाकडी वस्तू, स्थानिक फळे अशी वेगवेगळी दालने असतील. याशिवाय बांगड्या, घुमट, विजेच्या रोषणाईचे साहित्य, रांगोळी, सेंद्रिय गूळ यांचीही दालने असतील.