पणजी: देशात जागतिक दर्जाची ५० प्रतिष्ठित पर्यटनस्थळे विकसित करण्यासाठी केंद्र सरकार नवी योजना आखत आहे. या योजनेअंतर्गत गोव्यातही अशी पर्यटनस्थळे विकसित करण्याचे प्रयत्न सुरू आहेत. त्यासाठी प्रस्ताव केंद्र सरकारला सादर करण्याच्या सूचना राज्य सरकारला देण्यात आल्या आहेत, अशी माहिती केंद्रीय पर्यटन आणि कला व संस्कृतीमंत्री गजेंद्रसिंग शेखावत यांनी दिली. अटल भवन येथे आयोजित पत्रकार परिषदेत ते बोलत होते. यावेळी आमदार नीलेश काब्राल, भाजप प्रवक्ते रुपेश कामत, दयानंद कार्बोटकर, सिद्धेश नाईक आदी उपस्थित होते.

शेखावत म्हणाले की, केंद्र सरकारच्या ‘प्रसाद’ योजनेअंतर्गत जुने गोवे येथे उभारण्यात येणाऱ्या ‘हेरिटेज इंटरप्रिटेशन सेंटर’चे काम उत्खननादरम्यान ऐतिहासिक वस्तू सापडल्याने थांबवण्यात आले आहे. या वस्तूंचे पुरातत्त्वीय महत्त्व लक्षात घेता त्या नष्ट होणार नाहीत, याची काळजी घेणे आवश्यक आहे. त्यामुळे प्रकल्पाचे काम घाईने पुढे नेणे योग्य ठरणार नाही. राज्य सरकारने या प्रकल्पासाठी पर्यायी जागा उपलब्ध करून दिल्यास तेथे केंद्र उभारता येईल, असेही त्यांनी स्पष्ट केले.

दरम्यान, एसआयआर प्रक्रियेचे समर्थन करताना शेखावत म्हणाले की, देशभरातील मतदारांचे अधिकार सुरक्षित ठेवण्यासाठी ही प्रक्रिया राबवली जात आहे. काँग्रेसच्या सत्ताकाळात ११ वेळा एसआयआर प्रक्रिया राबवण्यात आली होती. त्यावेळी काँग्रेसने त्याला आक्षेप घेतला नव्हता.

‘एसआयआर’ला विरोध करण्यामागे काँग्रेसचा अजेंडा काय?

भारतात (India) दरवर्षी ८० लाख ते एक कोटी नागरिकांचा मृत्यू होतो. त्यामुळे गेल्या २० वर्षांत सुमारे २० कोटी लोकांचा मृत्यू झाला आहे. मात्र, मृत झालेल्या अनेक नागरिकांची नावे अद्याप मतदारयाद्यांत आहेत. तसेच, विविध कारणांनी एका राज्यातून दुसऱ्या राज्यात स्थलांतरित झालेल्या नागरिकांची नावे दोन्ही राज्यांच्या मतदारयाद्यांत आढळतात. याशिवाय, इतर देशांतून बेकायदेशीररीत्या आलेल्या घुसखोरांची नावेही मतदारयाद्यांत समाविष्ट आहेत. अशी नावे वगळण्यासाठीच एसआयआर प्रक्रिया राबवली जात आहे, असा दावा शेखावत यांनी केला.