म्हापसा: म्हापसा शहरातील लोक उकाड्याने हैराण होत असताना गेल्या पंधरा दिवसांपासून वीजपुरवठा वारंवार खंडित होत आहे. त्यामुळे त्रस्त नागरिकांच्या वतीने ‘स्वाभिमानी म्हापशेकर’ या बॅनरखाली शहरातील काही समविचारी लोकांच्या शिष्टमंडळाने गुरुवारी सकाळी म्हापशातील वीज कार्यालयाच्या कार्यकारी अभियंत्यांना एक निवेदन सादर केले.

म्हापसा शहरात विजेचा लपंडाव सुरू असतो, हे ऐकून कार्यकारी अभियंता प्रदीप नार्वेकर यांनी यावेळी आश्चर्य व्यक्त केले आणि आजवर या समस्येबाबत आपल्याकडे एकही तक्रार आली नसल्याचे त्यांनी शिष्टमंडळाला सांगितले. म्हापशाच्या नगरसेवक कमल डिसोझा आणि सामाजिक कार्यकर्ते नारायण राठवड यांच्या नेतृत्वाखाली भाई पंडित, श्रीकांत सीमेपुरुषकर, गुरुदास हरमलकर, प्रकाश राठोड यांचा या शिष्टमंडळात समावेश होता.

वीज खात्याचे अभियंते, लाईनमन व कर्मचारी रात्रंदिवस काम करून जनसेवा करीत आहेत, असेही त्या निवेदनात नमूद करून त्यांच्याप्रति कृतज्ञता व्यक्त करण्यात आली आहे. नैसर्गिक आपत्तीवेळी वीजप्रवाह खंडित होतो हे समजून घेता येईल. परंतु इतर वेळीही वीजदाबात अचानक चढ-उतार होतात. त्यामुळे विद्युत उपकरणे निकामी होतात. तसेच तासन तास वीज गायब होते, असे नार्वेकर यांच्या निदर्शनास आणून दिले.