Shashi Tharoor In Goa

लोकसभा निवडणुकीत भाजपला धक्का बसणार, चारशे नव्हे यावेळी त्यांना दोनशे जागांचा टप्पा पार करने देखील जड जाणार, असे काँग्रेसचे राष्ट्रीय नेते शशी थरुर म्हणाले.

काँग्रेस उमेदवारांचा प्रचार करण्यासाठी थरुर गोव्यात दाखल झाले आहेत. दाबोळी विमानतळावर दाखल झाल्यानंतर माध्यमांशी बोलताना त्यांनी इंडिया आघाडीबाबत देशात सकारात्मक वातावरण असल्याचे सांगितले.

गोव्यात दोन लोकसभा जागांसाठी येत्या सात तारखेला मतदान होणार आहे. प्रचार अंतिम टप्प्यात असताना काँग्रेस आणि भाजपचे मोठे नेते प्रचारासाठी राज्यात दाखल होत आहेत. शशी पुढील काही दिवस गोव्यात रमाकांत खलप आणि विरियातो फर्नांडिस यांच्यासाठी प्रचार करताना दिसतील.

केंद्रातील भाजप सरकाला नागरिक त्रस्त झाल्याचे दिसत आहे. मतदानाच्या पहिल्या दोन टप्प्यात भाजप विरोधातील नाराजी दिसून येत आहे.

देशात इंडिया आघाडीबाबत सकारात्मक वातावरण असल्याचे देखील थरुर यावेळी म्हणाले. या निवडणुकीत भाजपला धक्का बसेल, यावेळी त्यांना 400, 300 नव्हे 200 जागांचा टप्पा पार करने देखील कठीण जाईल, असे थरुर म्हणाले.

थरुर म्हणाले येत्या काळात आणखी चित्र स्पष्ट होत जाईल, सध्या देशभरात चांगल्या पद्धतीने प्रचार सुरु असून, लोकांकडून सकारात्मक प्रतिसाद मिळत आहे. पहिल्या दोन टप्प्यातील मतदानात समोर आलेल्या माहितीनुसार, भाजपला धक्का बसणार असे दिसतंय, असे थरुर म्हणाले.

भाजपने ज्योतिषी बदलावा

भाजपने पुढील पन्नास वर्षे काँग्रेस सत्तेत येणार नाही तसेच, राहुल गांधी पंतप्रधान होणार नाहीत, असा प्रश्न विचारला असता, थरुर यांनी भाजपने ज्योतिषी बदलावा असा सल्ला दिला.