पणजी: राज्यात अन्न आणि औषध प्रशासनाच्यावतीने छापे तसेच कारवाई करण्यात येत आहे. ही कारवाई अशीच सुरूच राहणार आहे. बनावट रंग तसेच भेसळयुक्त खाद्यपदार्थांद्वारे होणारा आरोग्याशी खेळ खपवून घेणार नाही, असा कडक इशारा आरोग्यमंत्री विश्‍वजीत राणे यांनी आज दिला.

माध्यमांशी बोलताना ते म्हणाले की, गेल्या काही दिवसांपासून एफडीएच्या अधिकाऱ्यांकडून विविध आस्थापने तसेच हॉटेल्स, रेस्टॉरंटस् वर छापे टाकले जात आहेत. या छाप्यांमध्ये अन्नपदार्थांमध्ये भेसळ आढळून आली आहे. आरोग्यासंदर्भात कुठल्याही प्रकारची हयगय सहन करणार नाही. अधिकाऱ्यांमार्फत ही कारवाई चालूच राहणार आहे, असेही राणे म्हणाले.

मला अंधारात ठेवून बोंडला प्राणीसंग्रहालय बंद

बोंडला प्राणीसंग्रहालय बंद करण्यात आले. मात्र, याबाबत वनमंत्री म्हणून मला कोणतीही माहिती अधिकाऱ्यांनी दिली नाही, ही अतिशय गंभीर बाब असून संबंधित अधिकाऱ्यावर शिस्तभंगाची कारवाई केली जाईल, असा इशारा वनमंत्री विश्वजीत राणे यांनी दिला आहे. याबद्दल संबंधित अधिकाऱ्याने स्पष्टीकरण द्यावे, लवकरच यासंदर्भात आढावा बैठक घेतली जाईल, असेही ते म्हणाले.

पाच प्राण्यांचा मृत्यू!

बोंडला वन्यजीव अभयारण्य प्राणीसंग्रहालयातील तीन ताडमांजर आणि दोन जंगली मांजरे अज्ञात विषाणूच्या संसर्गामुळे मरण पावल्यानंतर प्राणीसंग्रहालय पर्यटकांसाठी १ एप्रिलपासून तात्पुरते बंद ठेवण्यात आले आहे. प्राण्यांच्या मृत्यूमुळे वन विभागाने तातडीने पावले उचलली असून मृत प्राण्यांचे नमुने भोपाळ येथील प्रयोगशाळेत तपासणीसाठी पाठवले आहेत, जेणेकरून या आजाराचे नेमके कारण समजू शकेल.