मडगाव: पश्चिम बायपास प्रकल्प आणि सांडपाण्याच्या पाईपलाईनचे बहुचर्चित प्रश्न अद्याप सुटलेले नसताना यातच आता बाणावली जेट्टीचा प्रश्न समोर आला आहे. सरकार बाणावली बीचवर जेट्टी उभी करण्याचा घाट घालत असल्याने, पारंपारिक मच्छीमार आणि पर्यटनाशी (Tourism) संबंधित व्यवसायात गुंतलेले इतर लोक अस्वस्थ झाले आहेत. त्यांचा या प्रकल्पाला विरोध आहे. (Fishermen strongly oppose Benaulim jetty project in goa)

स्थानिकांनी दिलेल्या माहितीनुसार, काही दिवसांपूर्वी गोवा स्टेट कोस्टल झोन मॅनेजमेंट अथॉरिटी (GCZMA) चे एक पथक समुद्रकिनाऱ्यावर तपासणी करताना आढळून आले. हे पथक जेट्टी प्रकल्पाच्या व्यवहार्यतेचा अभ्यास करत होते, अशी माहिती समोर आली आहे.

“आम्ही आधीच विविध कारणांमुळे अडचणीत आहोत. या प्रस्तावित जेट्टीचा आमच्या उपजीविकेवर नक्कीच वाईट परिणाम होईल. हा प्रकल्प करू नये अशी आमची सरकारला विनंती आहे”, असे मच्छीमार म्हणाले.

पर्यटन क्षेत्राशी संबंधित व्यवसायात गुंतलेल्या स्थानिकांनीही हा प्रकल्प प्रत्यक्षात आल्यास आपली उपजीविका गमावण्याची भीती व्यक्त केली आहे. सरकारने या प्रकल्पावर फेरविचार करावा, अशी त्यांची इच्छा असून, आंदोलनाचा इशाराही त्यांनी दिला आहे.