Kadamba Transport: कदंब परिवहन महामंडळाने आता आपल्या डोक्यावरील बंद बसेसचे ओझे कमी करायला सुरुवात केली आहे. न धावणाऱ्या खराब बसेस स्क्रॅपमध्ये काढण्यास सुरुवात केली आहे. महामंडळाने काही दिवसांपूर्वीच ई निविदा जारी केली असून, पहिल्या टप्प्यात २३ बसेस स्क्रॅपमध्ये काढण्यात आल्याची माहिती महामंडळाचे महाव्यवस्थापक संजय घाटे यांनी ‘गोमन्तक''ला दिली.

कदंब परिवहन महामंडळाच्या पर्वरी येथील यार्ड व महामंडळाच्या इतर कार्यशाळांमध्ये बंद पडलेल्या दीडशेच्या आसपास बसेस आहेत, त्या स्क्रॅपमध्ये काढण्यास सुरुवात केली आहे. अनेक वर्षांपासून या बंद पडलेल्या बसेस जागा अडवून आहेत. या बसेस स्क्रॅपमध्ये काढल्या जाणार असल्याने भंगार अड्ड्यांचे स्वरुप आलेली जागा आता मोकळी होणार आहे. दुसऱ्या बाजूला महामंडळाने बॅटरीवर चालणाऱ्या इलेक्ट्रॉनिक बस सेवेवर अधिक भर देण्यास सुरुवात केली आहे.

त्याशिवाय महामंडळाकडे यापूर्वी असलेली व डिझेलवर चालणाऱ्या अनेक बसेसचे आयुर्मान संपत आले आहे. केंद्र सरकारकडून १५ वर्षांचे आयुर्मान संपलेल्या वाहनांना भंगारात काढण्याच्या आदेशाची अंमलबजावणी सरकारी वाहनांसाठी लागू झाली आहे.

कदंब महामंडळाला जर १५ वर्षे वय झालेल्या वाहनांचा नियम लागू झाला तर अनेक बसेस सेवेतून बाद होतील, अशी स्थिती आहे. भंगारात काढलेल्या २३ बसेससाठी बोलीधारकांसाठी दि.२५ पर्यंत निविदा दस्तऐवज अपलोड करणे सक्तीचे आहे. २९ रोजी सकाळी ११ वा. निविदा उघडल्या जातील,असे ई-निविदेत नमूद आहे.

आणखी १९८ ई-बसेस मिळणार

राज्यातील अंतर्गत वाहतूक पूर्णतः इलेक्ट्रॉनिक बसद्वारे करण्याचा महामंडळाचा मानस आहे. त्यासाठी केंद्र सरकारच्या सहकार्यामुळे राज्याला १९८ इलेक्ट्रॉनिक बसेस मिळणार आहेत. त्यातील ८३ बसेस राज्यातील रस्त्यांवरून धावू लागल्या आहेत. याशिवाय आणखी ११५ इलेक्ट्रॉनिक बसेस येणे बाकी असून, त्या आल्यानंतर आयुर्मान संपलेल्या बसेस स्क्रॅपमध्ये काढल्या जाण्याची शक्यता आहे.