मडगाव : सोनसोड्यावरील आगीवर अग्निशमन दलाने नियंत्रण आणले असले तरी अधून मधून ही आग घुमसणे शनिवारीही सुरुच होते. ही आग अधिक भडकू नये यासाठी कचऱ्याच्या ढिगाऱ्यावर माती घालण्यास सुरुवात करण्यात आली आहे. आतापर्यंत सुमारे 40 ट्रक माती या कचऱ्यावर टाकण्यात आली असून ज्या भागात ही आग लागली होती, ती दुसऱ्या बाजूने पसरु नये यासाठी पोकलॅन वापरून चर खोदण्यात आला आहे. (Sonsodo Fire News Updates)

मडगावच्या अग्निशमन दलाचे (Fire Brigade) अधिकारी गिल डिसोझा यांनी दिलेल्या माहितीनुसार आज सकाळीही परत आग धुमसू लागल्याने दोन गाड्या वापरुन या कचऱ्यावर पाणी मारून ती विझवण्यात आली. काल ही आग आटोक्यात आणण्यासाठी सुमारे 80 हजार लिटर पाण्याचा वापर करण्यात आला होता. तरीही रात्री आग परत धुमसल्याने पुन्हा आगीचे बंब या कचरा (Garbage) यार्डावर आणावे लागले होते.

दरम्यान या आगीत (Fire) पालिकेचेही मोठे नुकसान झाल्याची माहिती पुढे आली आहे. या आगीत पालिकेची दोन प्लास्टिक कचऱ्याचे बेलिंग करणारी मशिन्स जाळून खाक झाली. त्याशिवाय या ठिकाणी ठेवलेल्या कचरा पेट्याही आगीच्या भक्ष्यस्थानी सापडल्या अशी माहिती मिळाली आहे.