पिसुर्ले : गेल्या कित्येक वर्षांपासून सावर्डे पंचायत (Panchayat) क्षेत्रातील बदिंरधनगरवाड्यावर वास्तव करून राहणाऱ्या समाज बांधवांना पक्क्या रस्त्याची व्यवस्था नसल्याने नागरिकांचे प्रचंड हाल होत होते, त्यामुळे या वाड्याबरोबर काजरेधाट येथील नागरिकांना गंभीर समस्येला तोंड द्यावे लागत होते, यासाठी या वाड्यावर रस्त्याची सोय उपलब्ध करून द्यावी अशी मागणी येथील नागरिक करीत होते. त्याच प्रमाणे सावर्डे पंचायतीच्या वतीने बऱ्याच वेळा या संबंधी ठराव घेऊन सरकाराकडे पाठवले होते.

मागणीची दखल घेऊन या रस्त्या संबधी शासकीय पातळीवर सर्व सोपस्कार पूर्ण करून कुमठळ ते बदिंरवाडा पर्यंत रस्त्यांचे काम सुरू करण्यात आले आहे. त्यामुळे रस्त्यासाठी प्रतिक्षा करणाऱ्या धनगर समाज बांधवांचे स्वप्न पूर्ण झाले आहे.

सत्तरी (Satari) तालुक्यातील वाळपई मतदार संघात येणाऱ्या सावर्डे पंचायत क्षेत्रातील कुमठळ गावापासून काही अंतरावर असलेल्या बदिंरवाडा तसेच काजरेधाट या दोन्ही वाड्यावर रस्त्याची सोय नव्हती, त्यात सदर गाव हे म्हादई अभयारण्याच्या परिसरात येत असल्याने तेथे पक्का रस्ता करण्यासाठी अडथळा निर्माण झाला होता, त्यामुळे गेली कित्येक वर्षे नागरिकांना (Citizen) दगड वर आलेल्या कच्च्या रस्त्याने प्रवास करून घर गाठावे लागत होते, यामुळे आपत्कालीन समस्या निर्माण झाल्यास नागरिकांना गंभीर समस्येला तोंड द्यावे लागत होते. त्याच प्रमाणे शालेय मुलांना शाळेत ये जा करताना समस्या निर्माण होत होती.

त्यामुळे या दोन्ही वाड्यावर रस्त्याची सोय करावी यासाठी नागरिकांनी पंचायतीच्या माध्यमातून मागणी लावून धरली होती, त्या मागणीची दखल घेऊन शासनाच्या वरिष्ठ पातळीवरून हालचाली गतिमान करून या रस्त्याच्या कामाला मंजुरी मिळवून या रस्त्याचे काम मार्गी लागले आहे, सद्या बंदिरवाडा ते काजरेधाट गावापर्यंत रस्त्यांचे काम पूर्ण झाले असून, काजरे धाट ते कुमठळ जॅक्शन पर्यंत रस्त्यांचे काम जोरात सुरु आहे.

रस्त्यांचे काम करताना कोणत्याही झाडांची हानी केली नसून, उत्तम दर्जाचे पॅव्हर्स वापरून एकेरी रस्ता बनवला आहे, त्यामुळे गेल्या कित्येक वर्षांपासून सुरू असलेली नागरिकांची प्रतिक्षा संपली असून नागरिकांनी समाधान व्यक्त केले आहे.