चोडण: फेरीधक्क्यावर 'बेती' फेरी बोट बुडाल्याची घटना घडली आहे. घटना घडली त्यावेळी सुदैवाने बोटीत कोणी नसल्याने मोठा अनर्थ टळला आहे. फेरीत दोन ते तीन कर्मचाऱ्यांच्या दुचाकी असल्याची शक्यता प्रत्यक्षदर्शीनी वर्तवली आहे. समोवारी (२३ जून) सकाळी चोडण येथे ही घटना घडली. अग्निशमन दलाचे जवान घटनास्थळी दाखल झाले असून, बोटीतून पाणी बाहेर काढण्याचे काम सुरु आहे.

मिळालेल्या माहितीनुसार, चोडण फेरी धक्क्यावर सोमवारी सकाळी फेरीबोट बुडाली सुदैवाने बोटीत कोण नसल्याने मोठा अपघात टळला. बोटी पाणी भरल्याने बोट बुडाल्याचे सांगितले जात आहे. पंपाच्या मदतीने अग्निशमन दलाचे जवान बोटीतून पाणी बाहेर काढत आहे. बोटीचा काही भाग अद्याप बाहेर आहे. बोटमधील टँकमध्ये पाणी भरल्याने बोट बुडाली असल्याचे सांगितले जात आहे.

नदी जलवाहतूक विभागाचे संचालक विक्रमसिंह एन. राजेभोसले यांनी याबाबत स्पष्टीकरण दिले आहे. "बोटचा एक टँक पाण्याने भरल्याने बोट बुडाली असावी, पावसाचे पाणी बाहेर न काढल्याने हा अपघात झाला असावा, हे प्राथमिक दृष्ट्या दिसते," अशी माहिती राजेभोसले यांनी दिली आहे.

"अग्निशमन दलाचे जवान पंपाच्या मदतीने बोटीतून पाणी बाहेर काढत आहेत. पाणी बाहेर काढल्यानंतर बोट अपोआप वरती येईल," असे त्यांनी स्पष्ट केले. टँकमध्ये पाणी भरल्यानंतर बाहेर न काढल्यामुळे ही घटना घडली, असे म्हणत संचालकांनी बोटीवरील कर्मचाऱ्यांना जबाबदार धरले आहे.

"फेरीबोट उत्तम काम करत होती. त्यामध्ये कोणत्याही प्रकारचे छिद्र नव्हते डेकवरुन बोटच्या टँकमध्ये पाणी गेल्यामुळे पाणी बाहेर पडणारी छिद्र बंद झाली आणि बोट बुडाली. अपघातावेळी बोटीत तीन दुचाकी होत्या," अशी माहिती राजेभोसले यांनी दिली आहे.