पणजी : डिझेल संपल्यामुळे बस बंद पडल्याची घटना ताजी असतानाच कदंब प्रशासनाचा आणखी एक बेजबाबदारपणा समोर आला आहे. बदामी कर्नाटकहून पणजीला परतत असलेल्या कदंब बसचे टायर धुळेर म्हापसा येथे अचानक बाहेर आहे. बसचा वेग कमी असल्याने सुदैवाने जिवितहानी टळली आहे. मात्र कदंबचा प्रवास कितपत सुरक्षित यावर प्रश्नचिन्ह निर्माण झालं आहे.

गोव्यातून शेजारच्या महाराष्ट्र आणि कर्नाटक राज्यात चांगल्या दर्जाच्या बस पाठवल्या जातात. मुंबई, पुणे, शिर्डी, बंगळुरु, म्हैसूर यासारख्या मार्गावर कदंबकडून वातानुकुलीत आराम बससेवा पुरवली जाते. कर्नाटकमध्ये लांब पल्ल्यासाठी विनावातानुकुलीत मात्र चांगल्या बस दिल्या जातात. मात्र याच बसची निट दुरुस्ती किंवा देखभाल होत नसल्याने आता लांब पल्ल्याचा कदंबचा प्रवास किती सुरक्षित असा प्रश्न उपस्थित होऊ लागला आहे.

फोंड्याजवळ असलेल्या आर्ल- केरी सावईवेरे मार्गावरील कदंब बसगाडी डिझेल अभावी बंद पडली होती. या घटनेमुळे प्रवाशांना भररस्त्यात नाहक मनस्ताप सहन करावा लागला होता. मात्र याची कदंब महामंडळाचे चेअरमन उल्हास नाईक तुयेकर यांनी गंभीर दखल घेतली आहे. कदंब बसच्या चालकाला महामंडळाकडून कारणे दाखवा नोटीस बजावण्यात आली आहे. डिझेल न भरताच बसगाडी घेऊन जाण्याच्या बेजबाबदार कृतीबाबत चालकावर कारवाईची शक्यता वर्तवली जात आहे.