FDA Seized 700 kg Paneer In Porvorim: अन्न आणि औषध प्रशासन विभागाने पर्वरी येथे मोठी धडक कारवाई करत सुमारे 700 किलोग्रॅम 'बनावट' पनीरचा साठा जप्त केला. या कारवाईमुळे गोव्यात सुरु असलेल्या पनीरच्या अवैध रिपॅकेजिंग रॅकेटचा पर्दाफाश झाला असून अन्नसुरक्षेचा गंभीर प्रश्न उभा राहिला आहे.

एफडीए अधिकाऱ्यांची कारवाई

एफडीए अधिकाऱ्यांनी मिळालेल्या माहितीच्या आधारे पर्वरी येथील या युनिटवर छापा टाकला. तपासणीदरम्यान, येथे मोठ्या प्रमाणावर पनीरची बेकायदेशीरपणे रिपॅकेजिंग केली जात असल्याचे आढळले. या पनीरवर बनावट लेबल लावण्याचे काम सुरु होते. या लेबलवर पनीरची गुणवत्ता, ब्रँड आणि उत्पादन तारीख चुकीची नमूद केली जात होती.

अशा प्रकारे रिपॅकेजिंग केलेले पनीर निकृष्ट दर्जाचे किंवा मुदत उलटून गेलेले असण्याची शक्यता असते. हे पनीर ग्राहकांच्या आरोग्यासाठी अत्यंत धोकादायक ठरु शकते. या युनिटमधून गोव्यातील अनेक मोठ्या खाद्य व्यवसायांना नियमितपणे पनीरचा (Paneer) पुरवठा केला जात होता. हे युनिट राज्यातील हॉटेल, रेस्टॉरंट आणि केटरिंग व्यवसायांसाठी पनीरचा प्रमुख स्रोत होते.

पुढील तपास सुरु

एफडीएने अन्न सुरक्षा कायद्याचे उल्लंघन केल्याबद्दल हे संपूर्ण युनिट तात्काळ सील केले. एफडीएने हे बनावट पनीर तपासणीसाठी प्रयोगशाळेत पाठवले. या पनीरचा मूळ स्रोत काय, ते कुठून आणले जात होते आणि बनावट लेबल कुठे तयार केली जात होती, याबद्दल सखोल चौकशी सुरु आहे. ज्या मोठ्या खाद्य व्यवसायांना हे बनावट पनीर पुरवले जात होते, त्यांच्यावरही लवकरच कारवाईची शक्यता आहे. एफडीएच्या या कारवाईमुळे गोव्यातील (Goa) खाद्यपदार्थांच्या गुणवत्तेबाबत पुन्हा एकदा चिंता व्यक्त केली जात आहे.