म्हापसा: अन्न आणि औषध प्रशासनाच्या अधिकाऱ्यांनी गुरुवारी (ता.१५) मोहीम राबवत, अस्वच्छ तसेच योग्य कचरा विल्हेवाट न लावता चालणारी तीन चिकन सेंटर बंद करण्याचे निर्देश दिले. याशिवाय, म्हापसा पालिकेच्या सहकार्याने ६७ हजार रुपयांची आईस कँडीदेखील नष्ट करण्यात आली.

गुरुवारी, म्हापसा शहरात ही विशेष मोहीम राबविण्यात आली. यावेळी हाउसिंग बोर्ड परिसर, म्हापसा तार पूल परिसर आणि खोर्ली येथील १३ जागांची तपासणी करण्यात आली.

हाऊसिंग बोर्ड मोहिमेदरम्यान, तीन चिकन स्टॉल्स एफडीए परवान्याशिवाय अस्वच्छ परिस्थितीत कार्यरत असल्याचे आढळून आले. हे स्टॉल्स बंद करण्याचे निर्देश अधिकाऱ्यांनी दिले.

त्याचप्रमाणे, खोर्ली येथील एका जागेची देखील तपासणी केली जिथे योग्य परिस्थिती न ठेवता बर्फाच्या कँडीचा साठा असलेले सुमारे २५० बॉक्स जप्त करण्यात आले.