मडगाव: फातोर्डा वाहतूक पोलिसांनी वाहन नियमाचा भंग करणाऱ्या वाहनचालकांवर कडक कारवाई करताना आत्तापर्यंत १७३ जणांना पकडून त्यांच्याकडून दंड वसूल केला आहे. मागच्या महिन्यात नव्यानेच हे पोलिस ठाणे सुरू करण्यात आले आहे.

वाहतूक नियमभंग करणाऱ्यांवर येथील पोलिसांनी नजर ठेवली आहे.  विना हेल्मेट दुचाकी चालविणाऱ्या ९९ जणांना पोलिसांनी पकडले आहे. त्या पाटोपाठ नो एन्ट्रीतून वाहने चालविणाऱ्यांचा  क्रमांक लागत आहे. अशा प्रकरणात  एकूण तेहतीस  जणांवर कारवाई करून पोलिसांनी संबधितांकडून दंड वसूल केला.

वाहने  चालविताना मोबाईल वापरणे ५, क्षमतेपेक्षा जास्त लोकांना वाहनावर बसविणे २, विना सीट बेल्ट कार चालविणे ५, कुठेही वाहने पार्क करणे ७, विना वाहन क्रमांक ४ जणांवरही  पोलिसांनी कारवाई केली आहे. वाहन नियम उल्लंघनाची अन्य प्रकरणेही पोलिसांनी नोंदवून संबधितांना  दंड ठोठावला आहे. 

वाहने  चालविताना वाहन नियमांचे पालन करावे, कायदा कुणीही हाती घेऊ नये व कायद्याचा भंगही करू नये, असे आवाहन फातोर्डा वाहतूक पोलिस ठाण्याचे पोलिस निरीक्षक फिलोमिना कॉस्ता यांनी केले असून जो कायदा मोडेल त्याच्यावर कारवाई केली जाईल, असे स्पष्ट केले आहे.  

या पोलिस ठाण्यात  १ पोलिस निरीक्षक , २ उपनिरीक्षक, ४ साहाय्यक वाहतूक पोलिस उपनिरीक्षक,  १३ हवालदार, १४ पोलिस शिपाई, एक महिला साहायक पोलिस उपनिरीक्षक असा कर्मचारी वर्ग आहे.