मडगाव: राज्य हमरस्ता अडविणे, बेकायदा जमाव बनविणे, सरकारी नोकरांना कायदेशीर कारवाई करण्यापासून रोखणे अशा विविध गुन्ह्याखाली आज फातोर्डा पोलिसांनी फातोर्डाचे आमदार विजय सरदेसाई (Vijay Sardesai) आणि गोवा फॉरवर्डच्या (Goa Forward) सुमारे 100 कार्यकर्त्यावर गुन्हा नोंद केला आहे.

भारतीय दंड संहितेच्या 143 (बेकायदा जमाव जमविणे), 341 (अडवणूक करणे), 353 (सरकारी नोकरांच्या कामात व्यत्यय आणणे) यासह 149 (दंगल करण्याच्या इराद्याने जमाव जमविणे) या कलमाखाली गुन्हा नोंद केल्याची माहिती पोलीस निरीक्षक कपील नायक यांनी दिली.

काल फातोर्ड्यातील (Fatorda) विकासकामे बंद केल्याच्या निषेधार्थ विजय सरदेसाई आणि त्यांच्या सहकाऱ्यांनी मोर्चा काढून रस्ता अडविला होता. रस्ता मोकळा करण्यासाठी पोलीस आले असता मोर्चेकऱ्यांनी त्यांच्याही हुज्जत घातली होती. यामुळे सुमारे 1 तास राज्य हमरस्त्यावरील वाहतूक ठप्प झाली होती आणि लोकांना त्रास झाला होता.