मडगाव : सरत्या वर्षाला निरोप देऊन नवीन वर्षाचे स्वागत करण्यात सर्वजण दंग असताना, गोव्यातील फातोर्डा परिसरात एक मोठी चोरीची घटना समोर आली आहे. एसजीपीडीए (SGPDA) मार्केटजवळ उभी असलेल्या एका कारमधील लॅपटॉप, रोख रक्कम आणि महत्त्वाचे दस्तऐवज अज्ञात चोरट्यांनी पळवले. या चोरीमुळे परिसरात खळबळ उडाली असून मडगाव पोलिसांनी याप्रकरणी गुन्हा दाखल केला आहे.

३१ डिसेंबरच्या रात्री साधला डाव

मिळालेल्या माहितीनुसार, ही घटना ३१ डिसेंबरच्या रात्री ते १ जानेवारीच्या पहाटेच्या दरम्यान घडली. पर्यटनासाठी आणि नववर्षाच्या सेलिब्रेशनसाठी गोव्यात सध्या मोठी गर्दी आहे, याचाच फायदा चोरट्यांनी घेतल्याचे दिसत आहे.

फातोर्डा येथील एसजीपीडीए मार्केटच्या परिसरात एका व्यक्तीने आपली कार पार्क केली होती. मार्केट परिसरात लोकांची वर्दळ असतानाही, चोरट्यांनी गाडीत असलेला लॅपटॉप, ५,००० रुपयांची रोख रक्कम आणि मालकाची काही अत्यंत महत्त्वाची कागदपत्रे चोरट्यांनी लंपास केली.

पोलीस तपास

संबंधित कार मालकाने दिलेल्या माहितीनुसार, चोरीला गेलेल्या ऐवजाची एकूण किंमत सुमारे ९०,००० रुपयांच्या घरात आहे. लॅपटॉपमध्ये महत्त्वाचा डेटा असल्याने मालकाचे मोठे नुकसान झाले आहे. सकाळी जेव्हा मालक गाडीजवळ पोहोचला, तेव्हा त्याला चोरीचा प्रकार लक्षात आला. यानंतर तातडीने पोलिसांना पाचारण करण्यात आले.

पोलिसांनी घटनास्थळाचा पंचनामा केला असून परिसरातील सीसीटीव्ही (CCTV) फुटेज तपासण्याचे काम सुरू केले आहे. थर्टी फर्स्टच्या रात्री झालेल्या या धाडसी चोरीमुळे पर्यटकांच्या आणि स्थानिक नागरिकांच्या सुरक्षिततेचा प्रश्न पुन्हा ऐरणीवर आला आहे.

मडगाव पोलीस ठाण्यात अज्ञात चोरट्यांविरुद्ध तक्रार नोंदवण्यात आली आहे. पोलिसांनी संशयितांचा माग काढण्यासाठी तपास पथके तयार केली आहेत. मार्केट परिसरातील काही संशयास्पद हालचालींची माहिती गोळा केली जात आहे. विशेषतः नववर्षाच्या रात्री अनेक ठिकाणी पार्ट्या आणि गर्दी असल्यामुळे पोलिसांनी गस्त वाढवली होती, तरीही चोरट्यांनी पोलिसांना गुंगारा देऊन ही चोरी केल्याने आश्चर्य व्यक्त होत आहे.