मडगाव: चंद्रवाडा-फातोर्डा येथे चार वर्षांपूर्वी सर्वांना हादरवून टाकणाऱ्या दुहेरी खून प्रकरणातील रविनकुमार सडा आणि आकाश घोष या दोघांना गोवा सत्र न्यायालयाने जन्मठेपेची शिक्षा ठोठावली तसेच त्यांना पन्नास हजारांचा दंडही सुनावला. दक्षिण गोवा सत्र न्यायालयाच्या न्यायाधीश पूजा कवळेकर यांच्या न्यायालयाने हा निवाडा दिला.

८ मार्च २०२१ रोजी दुहेरी खुनाची घटना घडली होती. संशयितांनी मिंगेल मिरांडा आणि त्यांची सासू कातरिना पिंटो या दोघांचा निर्घृण खून केला होता. संशयितांचा अन्य एक अल्पवयीन सहकारी होता.

सर्व संशयित मिंगेल यांच्याकडे भाडेकरू म्हणून राहात होते. मिरांडा हे कंत्राटदार असल्याने त्यांनी या सर्वांना मजूर म्हणून आपल्याकडे कामाला ठेवले होते. या खटल्यात प्रथमदर्शनी साक्षीदार नव्हते. फातोर्डा पोलिस ठाण्याचे तत्कालीन पोलिस निरीक्षक कपिल नायक यांनी या प्रकरणातील संशयितांना अटक केली होती.

सरकार पक्षातर्फे वकील उत्कर्ष आवडे यांनी या खटला हाताळला होता. या खटल्यात सरकार पक्षातर्फे एकूण २४ साक्षीदार तपासण्यात आले. आवडे यांनी न्यायालयात भक्क्म युक्तिवाद करून संशयितांवरील आरोप सिध्द केले.

कामाच्या मजुरीवरून भांडण!

खुनाच्या घटनेनंतर संशयित फरार झाले होते. दुसऱ्या दिवशी त्या सर्वांना मुबंईत शिवाजी पार्क येथे जेरबंद केले होते. संशयित व मिरांडा यांच्यात कामाच्या मजूरीवरून भांडण होत होती. त्यातूनच खुनाची वरील घटना घडली होती. न्यायालयात सरकारपक्षाने पुराव्यानिशी ते सिद्ध केले होते. भारतीय दंड संहितेच्या ३०२ (खून) तसेच २०१ (पुरावा नष्ट करणे) ३९७ (चोरीच्या उद्देशाने खून करणे) या आरोपाखाली वरील दोघांना दोषी ठरवून न्यायालयाने शिक्षा ठोठावली. ३९७ कलमाखाली त्यांना सात वर्षांची सक्तमजुरीची शिक्षाही सुनावली आहे