पणजी : आपल्या अल्पवयीन मुलीवर बलात्कार केल्याचा आरोप असलेल्या एका बापाला मुंबई उच्च न्यायालयाच्या गोवा खंडपीठाने मोठा दणका दिला आहे. पीडित मुलगी आणि इतर साक्षीदारांची पुन्हा उलटतपासणी करण्यासाठी त्यांना न्यायालयात बोलवावे, हा आरोपीचा अर्ज न्यायालयाने फेटाळून लावला.

‘न्याय्य सुनावणीचा अधिकार केवळ आरोपीलाच नाही, तर पीडितेला आणि साक्षीदारांनाही आहे,” असे महत्त्वपूर्ण निरीक्षण न्यायालयाने नोंदवले. या प्रकरणात आरोपीवर भारतीय दंड संहिता, गोवा बाल कायदा २००३ तसेच पोक्सो कायद्याच्या कलम ६ अंतर्गत गंभीर गुन्हे दाखल आहेत.

पीडित मुलगी ही अवघी १३ वर्षांची असून, आरोपी तिचा स्वतःचा पिता आहे. यापूर्वी कनिष्ठ न्यायालयाने साक्षीदारांना पुन्हा बोलावण्याचा आरोपीचा अर्ज फेटाळला होता. त्या आदेशाला आरोपीने भारतीय नागरिक सुरक्षा संहितेच्या कलम ३४८ अंतर्गत उच्च न्यायालयात आव्हान दिले होते.

आरोपीच्या वकिलांनी युक्तिवाद करताना म्हटले की, पूर्वीच्या वकिलांनी योग्य प्रकारे उलटतपासणी केली नाही आणि काही महत्त्वाचे प्रश्न विचारले गेले नाहीत. त्यामुळे पुन्हा साक्ष नोंदवली नाही, तर आरोपीवर अन्याय होईल.

मात्र, सरकारी आणि पीडितेच्या वकिलांनी या युक्तिवादाला जोरदार विरोध केला. पोक्सो कायद्यांतर्गत पीडित बालकाला वारंवार न्यायालयात बोलावणे हे तिच्या मानसिक आरोग्यासाठी घातक ठरेल, तसेच हा केवळ खटला लांबणीवर टाकण्याचा प्रयत्न असल्याचे त्यांनी न्यायालयाच्या निदर्शनास आणून दिले.