Khorlim-Mapusa Tragedy: म्हापसा येथून एक हृदयद्रावक घटना समोर आली आहे. रुग्णवाहिका वेळेवर न मिळाल्याने तब्बल 30 मिनिटांपेक्षा अधिक विलंबाचा फटका एका व्यक्तीला बसला आणि त्यात त्याचा जीव गेला. असागाव येथील रहिवासी असलेले आणि वीज विभाग कार्यरत असलेले 46 वर्षीय दिनेश कोरगावकर यांचा या घटनेत दुर्दैवी मृत्यू झाला.

मिळालेल्या माहितीनुसार, कोरगावकर यांना खोर्ली-म्हापसा (Khorlim-Mapusa) येथील एका ठिकाणी कामाच्या ब्रेकदरम्यान अस्वस्थ वाटू लागले. त्यांनी तात्काळ जवळच्या एका घरात मदत मागितली. तेथील नागरिकांनी परिस्थितीचे गांभीर्य ओळखून लगेचच आपत्कालीन सेवांना संपर्क साधला, पण अर्ध्या तासाहून अधिक काळ होऊनही रुग्णवाहिका (Ambulance) घटनास्थळी पोहोचली नाही.

कोणताही पर्याय न राहिल्याने अखेरीस स्थानिक नागरिकांनी कोरगावकर यांना खाजगी वाहनाने म्हापसा जिल्हा रुग्णालयात नेण्याचा निर्णय घेतला. ते रुग्णालयाच्या (Hospital) अर्ध्या रस्त्यात असताना, अचानक पणजीजवळील पर्वरी येथून एक रुग्णवाहिका तिथे पोहोचली.

रस्त्यातच कोरगावकर यांना खाजगी वाहनातून त्या रुग्णवाहिकेत हलवण्यात आले आणि त्यांना त्वरीत रुग्णालयात नेण्यात आले. मात्र, डॉक्टरांनी तपासणी केली असता त्यांची नाडी (Pulse) थांबली असल्याचे आढळले आणि त्यांना मृत घोषित करण्यात आले.

रुग्णवाहिका सेवेतील या गंभीर विलंबाबद्दल स्थानिक नागरिकांनी तीव्र संताप व्यक्त केला आहे. या जीवघेण्या चुकीसाठी जबाबदार असलेल्यांवर कठोर कारवाईची मागणी नागरिकांनी केली. या घटनेने गोव्यातील आपत्कालीन प्रतिसाद प्रणालीची कार्यक्षमता पुन्हा एकदा तपासण्याची गरज निर्माण झाली आहे.