Panaji Police Station

पणजी: एरवी तक्रारदार पुरावा म्हणून एखादी वस्तू किंवा दस्तऐवज पोलिसांत सादर करतात. मात्र, आज शेतीच्या नुकसानीस जबाबदार म्हणून तक्रारदाराने चक्क म्हैसच पोलिस ठाण्यात हजर केली. या अजब प्रकाराची आज दिवसभर चर्चा सुरू होती.

त्याचे झाले असे की, मागील काही दिवस कानावर शिक्का लटकवलेली एक म्हैस ताळगाव येथील एका शेतकऱ्याच्या पिकांचे नुकसान करत होती. या म्हशीने पिकांची नासधूस तर केलीच, शिवाय पिकांसाठी लावलेली ठिबक सिंचनाच्या पाईप पायाने तुडवून मोडून टाकल्या. त्यामुळे आपले तब्बल ६ लाखांचे नुकसान झाल्याची तक्रार नॅथन डिसोझा या शेतकऱ्याने पणजी पोलिसांत नोंदविली आहे.

हे करताना त्याने पुरावा म्हणून टेम्पोमधून ती म्हैसच पोलिस ठाण्यात आणली होती. समाज कार्यकर्त्या सेसिल रॉड्रिग्स यांच्यासोबत या शेतकऱ्याने शनिवारी पणजी पोलिसांत तक्रार नोंदविली. या आगळ्यावेगळ्या पुराव्याची खमंग चर्चा सर्वत्र सुरू होती.