Goa Fake Notes Case : कर्नाटक-गोवा सीमाभागात बनावट नोटा चलनात आणणाऱ्या एका आंतरराज्य टोळीचा बेळगावच्या मार्केट पोलिसांनी सोमवारी (16 मार्च) अत्यंत चातुर्याने पर्दाफाश केला. या कारवाईत पोलिसांनी गोव्यातील तीन आणि बिहारमधील एका संशयित आरोपीला अटक केली असून त्यांच्या ताब्यातून 500 रुपयांच्या तब्बल 495 बनावट नोटा जप्त केल्या आहेत. या टोळीच्या अटकेमुळे बनावट नोटांचे मोठे रॅकेट उघडकीस येण्याची शक्यता वर्तवली जात असून, न्यायालयाने (Court) सर्व संशयितांना 27 मार्चपर्यंत न्यायालयीन कोठडी सुनावली.

पोलिसांनी दिलेल्या माहितीनुसार, शहरातील जुना पीबी रोडवरील भाजी मार्केटजवळ असलेल्या कार पार्किंगमध्ये काही संशयास्पद हालचाली होत असल्याची टीप पोलिसांना मिळाली होती. या माहितीच्या आधारे पोलिसांनी सापळा रचून तिथे उभ्या असलेल्या एका कारवर छापा टाकला. यावेळी कारमध्ये बसलेले तरुण पोलिसांना पाहून गडबडले. त्यांची झडती घेतली असता, त्यांच्याकडे 500 रुपयांच्या नोटांचे पुडके सापडले.

बारकाईने तपासणी केली असता, या सर्व नोटा बनावट असल्याचे निष्पन्न झाले. पोलिसांनी तत्काळ मोहम्मद अरबाज मोहम्मद अदम (21, रा. दक्षिण गोवा), रुपेश हनुमंत नाकोडे (26, रा. काणकोण, दक्षिण गोवा), मोहम्मद हुसेन बक्षी (23, रा. मडगाव, दक्षिण गोवा) आणि श्रवणकुमार टुनटुनमल्ली (25, रा. बेगूसराय, बिहार) या चौघांना ताब्यात घेतले.

या कारवाईत पोलिसांनी (Police) केवळ 2 लाख 47 हजार 500 रुपयांच्या बनावट नोटाच नव्हे, तर गुन्ह्यात वापरलेली सुमारे 3 लाख रुपये किमतीची कार आणि चार महागडे मोबाईल फोनही जप्त केले आहेत. ही टोळी गोव्याहून बेळगावात या नोटा खपवण्यासाठी आली होती की यामागे आणखी काही सूत्रधार आहेत, याचा तपास आता मार्केट पोलीस करत आहेत. विशेषतः भाजी मार्केटसारख्या गर्दीच्या ठिकाणी या नोटा चालवण्याचा त्यांचा विचार असावा, असा संशय व्यक्त केला जात आहे. या घटनेमुळे व्यापारी आणि नागरिकांमध्ये भीतीचे वातावरण पसरले असून, आर्थिक व्यवहार करताना नोटा तपासून घेण्याचे आवाहन पोलिसांनी केले.